GMN TV Politika Kalohan: Kandidatu PR Povu Mak Determina, La’os ho “Tula Liman”

Kalohan: Kandidatu PR Povu Mak Determina, La’os ho “Tula Liman”

289 views

Dadaun ne’e sai diskusaun namanas iha públiku, média sosiál no fatin-fatin kona-ba figura Kay Rala Xanana Gusmão mak tula liman ba líder se deit nia mak nia sai ona Prezidente Repúblika. Tanba ne’e, Deputadu Bankada Partidu Demokrátiku (PD), António da Conceição ‘Kalohan’ hatete, iha Nasaun demokrátiku sira atu hili sidadaun ida sai líder hodi lidera Nasaun, povu mak iha poder boot liu.

Kalohan hatete, atu sai ukun na’in hodi ukun povu, tenke konkista hanesan prosesu luta ba libertasaun pátria nian, ne’ebé ema la fó hanesan prezente ida ba povu Timor-Leste sai nasaun independente.

“Ha’u hanoin demokrasia ne’e la bele ho tula liman deit, demokrasia mak ne’e povu nia liman mak determina, povu mak determina ne’e se mak atu hetan, se mak la hetan, depende povu mak hili, klaru katak iha lider balun iha influénsia ida-idak ninia hatete balun tuir, mais la’os hotu hotu, ne’ebé ha’u fiar katak jesus kristu mai la hola ema sarani hotu dala ida, maibé lori tempu mak ema barak sei sarani los ka lae?, lider balun mos la signifika ema hotu hotu dehan hatete ne’ebé ema tuir hotu lae, demokrasia mak ne’e, povu nia aspirasaun mak determina, agora povu atu vota ba se vota partidu ne’ebé fó fiar ba ida ne’ebé depende ba povu,” dehan Deputadu PD ne’e, iha Parlamentu Nasionál (PN), Segunda (29/11).

Nia fó ezemplu, tula liman ne’e so ejiste iha Uma-Kreda, tanba Amu Bispu no Amu Papa mak bele tula liman ba sarani ka seminarista ida atu sai amu-lulik, liu hosi ordenasaun saserdotál.

 “Ha’u hanesan ema ida ne’ebé pernah eskola atu sai amu-lulik, ne’ebé ba ha’u tula liman ne’e so Bispu sira tula liman ba ema ne’ebé atu sai amu-lulik” katak nia.

Deputadu ne’e sente lametavel tebes ho maneira husi líder rejisténsia sira nian, kona-ba “tula liman” ka “hetan bensaun” husi líder rejisténsia balu mak foin bele sai Prezidente Repúblika. Tanba

Nune’e nia husu ba líder rejisténsia sira atu hatudu no rai hela ezemplu diak ba jerasaun foun sira, hodi hanorin jerasaun foun hatene hola desizaun rasik.

“Ha’u hanesan jersaun nebe mak kontribui ba rai ida ne’e nia ukun-rasik an, ha’u la menta ba hahalok sira hanesan ne’e, la eduka povu, atu hanoin rasik, la eduka mós povu bele hatene hanoin, mais dehan ba povu, ami dehan ba imi mak ida ne’ebá deit, partidu politiku sira ba halo kampaña halo saida, la vale, kandidatura atu PR ba halo kampaña ne’e ba saida la vale ba buat ida. Tanba dehan ba mós sira sei dehan maun Xanana hakarak mak ha’u. Se ida ne’e mak iha, ha’u hanoin nasaun ida ne’e, hanesan uluk tempu Indonézia ninia ne’e, bahasa dehan ‘mendewakan orang di dalam negara’ ita la bele halo buat sira hanesan ne’e, tanba konkista mak lori ita ba poder, ita tenke hanorin povu ne’e atu hatene hanoin hola rasik desizaun,” sujere Kalohan.

Foin lalais ne’e, sai polémika iha públiku katak, líder rezisténsia Kay Rala Xanana Gusmão tula liman ona ba Ramos Horta hodi kandidata-an ba PR iha Eleisaun Prezidensiál 2022-2027. No Xefe Estadu Maior F-FDTL, Tenente Jenerál Lere Anan Timur, deklara, la konkorda Xanana Gusmão apoiu ema seluk hodi kompete ho nia, iha Eleisaun Prezidensiál (Elpres) ba tinan 2022-2027.

“Ha’u agora seidauk deside, mas ha’u-nia maun Xanana tula liman ba ema seluk hanesan tula ba Falur ka, tula ba Aluk ka, tula ba maun Nana ne’e ha’u konkorda, maibe tula fali ba ema seluk ne’e ha’u dehan maun o moral laiha, hau hatete ba nia maun moral laiha hau deziste ona maun foti as liu fali nia do que hau maun la hatene katak,uluk iha ai laran ne’e hau atu fo hau nia vida ba ita bo’ot atu moris, ida ne’ebé o tula liman ne’e, dala ruma uluk hakarak ita bo’ot mate, hau la tau problema,mas tamba Prezidente ne’e ami mai husi ai laran ne’e husi kuadru superior sira ne’e” Xefe Estadu Maior Jenerál F-FDTL, Tenente Jenerál Lere Anan Timur, hato’o deklarasaun ne’e, hafoin hasoru malu ho Prezidente Repúblika, iha Palásiu Prezidensial Aiatarak Laran, Kuarta (24/11).

To’o ohin loron ne’e, foin mak Prezidente Partidu KHUNTO, Armanda Berta dos Santos mesak mak deklara ona ba públiku, atu kandidata-an hodi konkore iha eleisaun prezidensiál tinan oin. No iha mós grupu balu deklara apoiu atuál Deputadu António de Sa Benevides no Isabel Ferreira atu kandidata an ba PR iha ElPrez 2022, maibé parte rua ne’e seidauk iha deklarasaun ofisiál atu kandidata an ba PR.

Iha jornada polítika Timor-Leste nian hatudu ona iha realidade katak, bainhira líder rezisténsia Kay Rala Xanana Gusmão, apoia José Ramos Horta hodi kandidata-an ba PR, Ramos Horta konsege sai duni PR, no apoia Taur Matan Ruak ba PR, Taur konsege sai PR, nune’e mos apoia Francisco Guterres Lú Olo kandidata-an ba PR, no Lú Olo konsege sai PR.

Lei inan Konstituisaun RDTL Parte III Organizasaun Podér Polítiku Nian, Títulu I Prinsípiu Jerál Sira, Artigu 62 (Titularidade no Ezersísiu Podér Polítiku Nian) iha artigu ne’e hatete, “Podér polítiku iha povu nia liman, ne’ebé sei hala’o tuir Lei-Inan haruka.”

No iha Títulu II Prezidente-Repúblika, Kapítulu I Estatutu, Eleisaun no Nomeasaun, Artigu 76 (Eleisaun) iha artigu ne’e númeru 1) hatete, Atu sai Prezidente-Repúblika, sei hili tuir sufrájiu universál, livre, diretu, sekretu no idaidak.GMN


Banner

Foto

Notisia Ikus

Governu adia dikusaun ba pedidu reforma Lere Anan Timur

January 20, 2022
Reuniaun Konsellu Ministru (KM) iha Palásiu Gov...

La atende kontaktu deputadu nian, PPN “hirus” MOP Salvador

January 20, 2022
[caption id="attachment_59069" align="aligncenter"...

CNE seidauk simu lista kandidatura PR

January 19, 2022
[caption id="attachment_59064" align="aligncenter"...

Eis Padre Martinho Gusmão deklara kandidata-an ba PR

January 19, 2022
Eis padre Martinho Germano da Silva Gusmão anú...

Ministru José Agustinho “ameasa” hasai funsionáriu APORTIL 24

January 19, 2022
[caption id="attachment_59043" align="aligncenter"...
1 2 3 683

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker