Xefi Estadu Maior FALINTIL Forsa Defeza Timor-Leste (F-FDTL) Koronel Falur Rate Laek, konsidera loron 7 Dezembru 1975 invazaun Indonesia mai Timor-Leste viola soberania nasaun Timor-Leste nian.
Indonesia halo violasaun ba soberania Timor-Leste, tamba Timor-Leste proklama ona nia independensia unilateral iha 28 Novembro 1975. Falur mós dehan, loron 7 Dezembru ne’e importante.
``7 Dezembru loron ne´ebé mak sira mai oho ita, viola ita -nia soberania destroi ita-nia sasan, liu-liu legaliza ofisial ba Timor-Leste, ne´ebé ita bolu loron revolusionariu,`` esplika Koronel Falur Rate Laek, ba GMN, Sesta (07/12/2017), hafoin asiste hela torneiu futsal iha Kuartel F-FDTL, Fatuhada, Díli.
`` 7 Dezembru Diresaun Comite Central da FRETILIN konsege auto organiza a´an, konsege suu sira-nia determinasaun lori funu hasoru sira to’o tinan naruk ita ukun a´an,`` dehan Falu, relasion ho loron memoria ne’ebé Estadu hanaran.
Falur realsa tan, Indonesia halo invazaun mai Timor Leste mundu internasional mós hatene katak Timor Leste iha funu bo’ot ida.
Husu RI fó referendu ba West Papua
Nune’e mós, Front Solidariedade Maubere Libertasaun West Papua (FSMLWP), aproveita komemorasaun loron 7 Dezembru invazaun Indonesia tinan 1975, hodi husu ba Estadu Repúblkik Indonesia (RI), atu fó referendu ba West Papua.
FSMLWP iha Kinta (07/12/2017), organiza malu konsentra iha estrada públiku besik jardim Borja da Costa Farol Díli atu hakat liu ba halo manifestasaun pasífiku iha Embaixada Indonesia iha Díli Timor-Leste nia oin hodi hato’o sira ninia solidariedade ba povu West Papua, maibe autoridade seguransa Munísipiu Díli la autoriza sira atu halo manifestasaun. Tanba ne´e haruka sira fila de´it husi area refere sa’e mai iha sede Front Traballador Maubere Farol Díli hodi hala´o konferensia imprensa.
Liu husi konferensia imprensa Front Solidariedade Maubere ba Libertasaun West Papua ejiji pontu hat ba Estadu Indonesia.
``Taka freeport; Fo ami-nia direitu atu hamrik mesak referendu ba West Papua. Hapara kriminilidade hasoru povu no ativista luta ba Papua. Husu atu dada militar organik no non organik husi rai West Papua,``esplika Portavoz FSMLWP, Ela Variana Seja.
Iha konferensia imprensa FSMLWP dada mós bandeira Bintang Kejora Papua nian no kaer mós spanduk hakerek iha lolon ho liafuan bahasa Indonesia, stop kriminilisasi terhadap rakyat Papua no fo liberdade total ba West Papua no liafuan seluk tan.
Koordenador FSMLWP, Letornino da Silva, hateten, antes sira halo manifestasaun sira hato’o uluk ona ona karta lisensa ba iha Komando PNTL Díli atu halo asaun iha Embaixada Indonesia nian iha Farol Díli, maibe Polísia la autoriza, maibe sei iha tempu atu hato’o petisaun ba Embaixada.
``Ita-nia aktividade manifestaun to´o iha dalan sira impede. Mas atu hateten katak, sira mós trai ona prinsipiu ne´ebé mak ami atu hala´o, maibe laiha buat ida ami nafatin koopera, la´os loron ohin de´it maibe loron seluk ami sei hato´o ami-nia petisaun,``dehan Letornino da Silva.
Nia mós dehan, razaun sira halo asaun solidariedade ne´e tanba uluk tempu okupasaun Indonesia iha Timor mós Papua hato’o solidariedade ba povu Timor-Leste.
``Ita hanesan movimentu hanesan Timor oan ita nafatin fó solidariedade ba sira nune´e sira mós bele hetan libertasaun mós hanesan ita atu sira goza sira-nia rikusoin ne´ebé mak agora dadauk ema explora,``dehan Letornino da Silva .
Tuir observasaun GMN haree katak, Forsa Rezerva ne´ebé kaer gas lakrimujéniu ho pistola no apoiu mós Unidade Tránzitu Díli hodi fo seguransa ba asaun refere.avi
