GMN TV Politika Hasa’e bandeira iha teritóriu TL, AMP konsidera vitória ba luta salva K-RDTL

Hasa’e bandeira iha teritóriu TL, AMP konsidera vitória ba luta salva K-RDTL

0 views

Patidu tolu ne’ebé forma  Aliansa Maioria Parlamentar (AMP) hanesan, CNRT, PLP no KHUNTO,  hasa’e tan bandeira partidu tolu ne’e nian iha Postu Administrativu hat Munisípiu Dili, no hasa’e mós iha teritoriu Timor-Leste (TL) tomak.

Ho atividade hasa’e bandeira ne’e, AMP konsidera hetan ona vitória ba sira-nia luta durante ne’e iha Parlamentu Nasional hodi salva Konstituisaun Repúblika Demokrátika Timor Leste (K-RDTL).

Objetivu husi atividade hasa’e bandeira ne’e, atu hatudu ba públiku katak, ba oin partidu tolu ne’e sai ida de’it hodi infrenta kualker situasaun ne’ebé mak sei mosu iha Timor Leste.

“Atividade dada bandeira partidu tolu ne’e nian iha Munisípiu Dili, deputadu 35 iha parlamentu nasional senti katak, luta atu salva konstituisaun ne’e hetan ona vitória,” katak Reprezentante deputadu AMP Parlamentu Nasional, Deometro Amaral iha nia intervensaun ba dada bandeira partidu tolu ne’e nian iha sede partidu PLP Vilaverde, Sábadu (16/12).

Deometro hatutan,  reprezentante deputadu AMP, Deometro Amaral hateten, ema sira ne’ebé lidera partidu tolu ne’e, ema sira ne’e fó duni sira nia laran no luta ba rai ida ne’e.

“Maun Xanana, maun Taur no maun Naimori, la’os ema traidor, no la’os ema ne’ebé hanoin atu halo kudeta ba sistema rai ida ne’e nian, maibé sira hamrik iha ne’e ho fiar aan hodi fó resposta  ba inserteza Governu iha ita-nia rai, no fó resposta ba liafuan todan sira partidu tolu ne’e nian, tanba ita rona bebeik katak, asaltu poder, halo golpe, maibé resposta lolos ne’e katak, partidu tolu ne’e hakarak salva ita nia konstituisaun RDTL,” dehan Deometro.

Nia haktuir, konstituisaun RDTL hakerek hotu ona saida mak ohin loron Opozisaun halo iha Parlamentu Nasional hanesan, mosaun sensura no rejeisaun programa Governu. AMP nunka inventa sasan, hodi halo asaltu poder.

Tanba ne’e, Deometro dehan, ho atividade dada bandeira partidu tolu ne’e nian iha Munisípiu hotu, deputadu 35 iha Parlamentu Nasional senti katak, luta atu salva konstituisaun ida ne’e hetan ona apoiu masimu.

“Partidu tolu ne’e reafirma katak, hamrik hamutuk iha Aliansa Maioria Parlamentar, ita hatudu ba ita nia adversáriu sira katak, ita preparadu ba opsaun saida de’it mak ita nia Prezidenti Repúblika sei foti. Ita hamrik la’os atu halo presaun ba ita nia Prezidenti Repúblika hodi kontra konstituisaun, maibé ita hamrik iha ne’e atu reafirma katak, ita hamutuk ho Prezidenti Repúblika hodi salva guarda valores principal sira ne’ebé hakerek ona iha konstituisaun RDTL,”  katak Deometro.

Alende ne’e, Sekretáriu Jeral CNRT, Francisco Kalbuadi Lay, husu ba koordenador nivel Munisípiu to’o Aldeia atu hala’o nafatin liña koordenasaun hodi habelar informasaun AMP nian ba povu.

“Ha’u atu hato’o de’it katak, liña koordenasaun ita hala’o nafatin husi nivel nasional, Munisípiu to’o Postu Administrativu, nune’e mós to’o Suku no Aldeia. Ita servisu hamutuk ba interese povu no nasaun doben ida ne’e,” katak Kalbuadi Lay.

Nune’e mós,  Koordenador PLP Munisípiu Dili, Abel dos Santos hateten, komesa agora ba oin, AMP prepara aan atu hasoru kualker desizaun husi Prezidenti Repúblika, Francisco Guterres ‘Lu-Olo.

Partidu tolu ne’ebé mak públiku  hatene hanesan, CNRT, PLP no KHUNTO loron ida ohin ne’e, sai ida de’it, no sai polítika ida de’it atu lori ba to’o baze.

 “Ha’u nia mensazen ba koordenador Postu, Suku no Aldeia sira katak, habelar no konsolida ita nia baze katak, hahú loron ohin ne’e, partidu tolu ne’e sai ida de’it. ho bloku ida ne’e atu hateten katak, ita prontu atu simu desizaun saida de’it husi ita nia Estadu,” katak Abel dos Santos.

Tuir ajenda, iha semana ida ne’e nia laran, partidu tolu ne’e sei dada bandeira AMP iha Munisípiu 11, inklui mós Rejiaun Administrativa Espesial Oe-cusse Ambeno.cos


Banner

Foto

Notisia Ikus

CESLINK bele ona sai empreza telekomunikasaun iha TL

September 17, 2021
Ministériu Transporte Komunikasoins (MTK), Dire...

Governu sei hadia infraestrutura ne’ebé estragu husi DN

September 17, 2021
Primeiru Ministru (PM) Taur Matan Ruak hatete, G...

Fulan oin, ró Berlin-Ramelau to’o TL

September 17, 2021
Ministru Transporte no Komunikasaun (MTK) José ...

Posibilidade Díli implementa uluk new normal

September 17, 2021
Posibilidade Munisípiu Díli, Governu sei imple...

Komisaun rekrutamentu publika ona naran kandidatu F-FDTL foun

September 16, 2021
Komisaun rekrutamentu FALINTIL-Forsa Defeza Timo...
1 2 3 640

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker