GMN TV Politika MEUJTIL konsidera ukun na’in lakon sentidu Estadu

MEUJTIL konsidera ukun na’in lakon sentidu Estadu

0 views

Movimentu Estudantes Universitáriu Juventude Timor-Leste (MEUJTIL), konsidera ukun na’in sira iha Timor Leste (TL) hahú lakon sentidu Estadu, tanba polítika ne’ebé sira halo ba nasaun no povu ne’e nakonu ho vingansa polítika.

Portavoz MEUJTIL, Sebastião Notodane, hateten, drama no jogu polítiku hirak ne’e, implika situasaun hanesan agora dadauk povu hasoru ne’e, tamba bele fó kauza ba  povu Timor Leste nia vida.

“Susar oi-oin bele mosu fila fali tan iha ita-nia rai, ba sirkumtansia hirak ne’e, MEUJTIL lian laek hanoin hikas fali mehi  heroi sira nian,  sempre inspira ami nu’udar jerasaun kontinuador, iha obrigasaun moral hakarak fó lian kbi’it ba harmonia, social no kultura demokrásia ne’ebé sempre implika fila fali ba asaun drama, teatru politiku ne’ebé mosu iha ita hotu nia le’et. Nu’udar jerasaun foun firme desididu neutral no independente iha koridores movimentu, ita hotu tenki haka’as aan luta hasoru forsa ne’ebé destruitiva ba dame, maibé ita tane aas nafatin liberdade ne’ebé ita hetan husi nasaun foun ida ne’e,” hateten Sebastião Notodane ba jornalista sira liu husi konferensia ba imprensa, iha Kampus UNITAL Becora  Dili, Kuarta (20/12).

Tanba ne’e, nia husu ba sidadaun hotu atu hamutuk hodi luta hasoru hahalok drama polítika iha TL,  tanba hahalok ida ne’e atu sobu ka harahun unidade no vitória bo’ot ne’ebe hetan tiha ona.

MEUJTIL iha inisiativa hodi mobiliza no konsiensializa ema hotu sai nu’udar  promotor ba unidade nasional,  atu salva guarda intregridade soberania RDTL ne’ebe hatur lolos prinsipiu pilares intelektual, hodi salva guarda  povu tomak, atu reafirma tan espíritu luta nian ba rekonsilia dame iha sivil, politiku, relijiaun, komunidade, ba ema hotu  iha TL.

Tuir MEUJTIL nia haree katak, hahú husi formasaun VII Governu  kontituisional to’o mai aprezentasaun programa no Orsamentu Retifikativu (OR), servidor Estadu ne’ebé reprejenta no aspirasaun povu iha uma fukun Parlamentu Nasional, halo diskusaun  no debate laiha seriedade, hatudu sira-nia maturidade polítiku hodi garantia paz no estabilidade, maibé tau fali intrese privadu ka grupu minoritáriu hodi implika situasaun.

MEUJTIL haree katak, krize polítika ida ne’e bele hamosu fila fali polemika bo’ot iha povu Timor-Leste nia le’et, hodi sidadaun hotu iha prekupasaun ba situasaun ka jogu polítika ida ne’e.

Iha oportunidade ne’e mos, MEUJTIL rekomenda ba servidor Estadu tomak liu-liu atu muda sira-nia karakter  polítika hodi simu malu,  hodi garante povu nia esperansa  ba paz no estabilidade.

“Tanba ami jerasaun foun hakarak imi jerasaun tuan husik kultura polítika ne’ebé diak ba ami jerasau foun hodi banati tuir, no fundador sira ne’ebé  hari’i TL lalika fila kotuk ba malu, nakonu ho sokar lia ho bobar lia bosok, hodi defende grupo minoritáriu nia hakarak,  maibé la tane aas nasaun nia dignidade.  Ami nia lian laek,  husu ba fundadores Estadu tomak, ami jerasaun foun presiza imi nia hamutuk,  bele hamosu naroman nabilan fila fali paz  no estabilidade iha ita nia rai laran,” katak Sebastião.

MEUJTIL ameasa sei latuir EA

Movimentu Estudante Universitáriu Juventude Timor-Leste (MEUJTIL) no Veteranu sira ameasa sei la tuir eleisaun antesipada, kuandu ukun na’in sira la respeita povu nia votus hanesan agora dadaun ne’e.

Portavoz MEUJTIL, Eldino Samalulik, hateten, MEUJTIL la aseita atu  realiza Eleisaun Antesipada iha nasaun doben ida ne’e.

“Hakarak fó hanoin katak, ami lakohi lider polítiku sira uja povu ne’e hanesan instrumentu polítiku,  tanba sira la respeitu ona povu nia votus, ne’ebe povu fó tiha ona iha eleisaun Jeral liu ba.  Tanba ne’e ami sei organiza inan aman atu labele tuir eleisaun antesipada ba vota, tanba saida mak  nai ulun sira lakohi konsensu atu ukun hamutuk, atu se deit mak  ukun ne’e dalan ba demokrásia,  ida ne’e mak ami nia prekupasaun,”katak Eldino Samalulik ba GMN iha Kampus UNITAL Bekora Kuarta (20/12).

Maibé portavoz MEUJTIL ne’e hatutan, hakarak atu realiza  eleisaun antesipada, MEUJTIL sei organiza malu atu la vota iha eleisaun antesipada.

“Ami sei la tuir eleisaun antesipada  ho razaun, polítiku sira uza ami hanesan instrumentu halai tun sa’e gasta ami nia enerjia, gasta ami-nia osan atu ba vota, no bele mate tan deit sira-nia kadeira polítik no poder,”katak Eldino.

Nia husu ba polítiku sira  atu fó liman ba malu hodi ukun hamutuk, tanba buat ne’ebé mak importante liu ba povu mak, paz no moris diak,  duke hadau malu poder nia valor laiha.

“Diak liu tuur hamutuk hodi hanoin lisuk hodi buka solusaun, tanba foin dadaun povu fó tiha ona sira-nia direitu liu husi eleisaun jeral, ne’eduni laiha ona tempu atu povu ba vota tan,”haktuir Eldino.

Iha fatin hanesan Front Mahasiswa Timor-Leste, Noe Bernadino Ximenes, hateten, MEUJTIL la konkorda ho eleisaun antesipada, tanba gasta deit orsamentu Estadu.

 “Nusa osan ne’e la gasta  ba hadia povu nia susar hanesan bee moos, eletrisidade, estrada no buat seluk tan, duke ita gasta ba eleisaun antesipada, alende ne’e bele mós fó implikasaun polítika ne’ebé mak agora akontese, sei implika intrese pesoal no grupu, ho propaganda sira ne’e mak nivel partidu polítiku sei sunu ita-nia vontade para sira bele halo problema iha fatin-fatin,”katak Noe.aba    


Banner

Foto

Notisia Ikus

Governu sei dezenvolve Sentru Agríkola Quinta Shalom Farm Hera

September 20, 2021
Primeiru Ministru (PM), Taur Matan Ruak, hatete,...

PN haree Governu book-an “maten liu” antisipa dezastre naturais

September 20, 2021
Parlamentu Nasionál (PN) haree Governu book-an ...

Vizita izolamentu Lahane, PM Taur rekomenda pontu importante tolu

September 20, 2021
Primeiru Ministru (PM), Taur Matan Ruak, hala’...

Konta deit istória, sai dezafiu ba konstrusaun Estadu

September 19, 2021
Sekretáriu Jerál Partidu Uniaun Demokrata Timo...

CNRT seidauk iha kandidatu ba PR

September 19, 2021
Komisaun Polítika Nasionál (KPN) Partidu CNRT,...
1 2 3 641

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker