Atu lideransa nasional sira túr hamutuk hodi hakotu impase polítiku ne’ebé dau-daun ne’e nasaun infrenta, bankada opozisaun Partido Democrático (PD) delega ninia deputadu nain tolu vota a favor ba Orsamentu Jeral Estadu (OJE) 2019 iha jeneralidade no deputadu nain rua vota kontra.
“Ami hakarak titip pesan ba ba maun sira, hodi dehan katak ba Timor nia di’ak ami apoiu, maibé ba Timor nia át ami sei la fó ulun nafatin, tanba ida ne’e maka ami nain 5, nain 3 fó votus a favor, sira nain 2 ami dehan lalika fó votus. Hodi dehan ba sira katak votus tenki ser ho ninia sentidu, votus ne’ebé fó la’os dehan buat hotu loos, maibé buat ne’ebé maka laloos tenki ser expresa, tanba ida ne’e maka desizaun ikus maka votasaun iha jeneralidade ne’e”, Xefi bankada PD, Antonio da Conceição ‘Kalohan’ ba jornalista sira iha uma fukun PN, Kuarta (13-12-2018).
Nia esplika, bankada PD balun vota a favor ba OJE 2019 ne’e, ho intensaun atu hatudu ba públiku no lider sira katak PD fó apoiu ba proposta OJE refere no vota kontra ninia sentidu ne’e atu husu ba lider nasional sira hanesan Prezidente Repúblika (PR), Francisco Guterres ‘Lú Olo’, Kay Rala Xanana Gusmão, Mari Alkatiri, Primeiru Ministru (PM), Taur Matan Ruak no Ramos Horta.
“Prinsipalmente ami dehan veteranu ida (Ernesto Fernandes ‘Dudu-red’) maka vota kontra, hodi dehan katak ita tenki ser túr hamutuk, uluk funu ita hamutuk, tanba saida maka halo dezenvolvimentu ita tenki ser la’o ketak-ketak, ida ne’e maka ami hili katuas Dudu vota kontra”, haktuir Kalohan.
Nia akresenta, antes tama votasaun ba OJE 2019 bankada PD planeadu nanis ona, katak balun vota a favor no balun vota kontra, maibé la’os katak deputadu bankada PD lakon ona konfiansa ba malu.
“Sim ne’e ami nia intensaun duni, atu fó mensajen polítika, la refleta polítika partidu nian ne’ebé dehan fahe malu, maibé ida ne’e refleta polítika partidu nian atu promove unidade nasional, hodi dehan katak OJE 2019 ita presiza, maibé túr hamutuk atu koalia ne’e importante teb-tebes”, informa Xefi bankada PD ne’e.
Xefi bankada PD, Kalohan hatutan mós katak, pozisaun bankada PD ba votasaun iha espesialidade ninian, ne’e depois maka haree.
Entretantu deputadu PD nain tolu (3) ne’ebé fó votus a favor ba OJE 2019 maka hanesan Xefi bankada PD, Antonio da Conceição ‘Kalohan’, deputadu Mariano Assanami Sabino, deputada Elvina Sousa no nain rua (2) ne’ebé vota kontra maka Vise Xefi bankada PD, Adriano do Nascimento no deputadu Ernesto Fernandes ‘Dudu’.ves
