Forum ONG Timor Leste (FONGTIL) realiza workshop ida hodi partilla informasaun ba sosiedade sivil sira kona ba Association of South East Asian Nations (ASEAN), hodi bele intende no apoiu Timor-Leste nia polítika adezaun ida ne’e.
Diretur Ezekutivu FONGTIL, Daniel Santos do Carmo, hateten, FONGTIL realiza Workshop ne’e, ho objetivu atu haree kona ba asuntu Timor-Leste nia adezaun ASEAN.
“Importante ba Timor-Leste sosiedade sivil nia haree katak, adezaun Timor-Leste nian ba ASEAN ne’e importante, tanba iha vantazen maka ita haree husi aspetu sosiu ekonomia, prosesu konstrusaun Estadu, liu-liu ba ASEAN oinsa mak ita bele komunika ba malu, apoiu malu, entermus oinsa promove direitus humanus, direitu traballador ne’e importante tebes iha ita-nia rain” dehan Daniel ba Jornalista sira iha nia Salaun FONGTIL Cacoli Dili, Sesta Feira (21/12/2018).
Tuir Daniel Santos, vantajen bo’ot liu ba Timor-Leste adere ba ASEAN mak loke Timor-Leste ba mundu atu kuñese, liu-liu iha ASEAN, atu nune’e Timor-Leste bele hetan apoiu husi membru ASEAN sira.
“Preparasaun ne’ebé ita halo, hatudu Timor-Leste bele realiza ona ASEAN People Forum iha Timor-Leste iha tinan 2006, ita ko’alia kona ba asuntu fronteira marítima, ita mobiliza opiniaun husi ASEAN tomak, ba halo demonstrasaun iha embaixada Australia, ezije direitu Timor-Leste nian ba iha fronteira marítima, no preprasaun ASEAN People Forum iha preparasaun diak, no komunikasaun sosiedade sivil iha ASEAN”, katak Daniel.
Nia esklarese, importante ba tinan ida ne’e mak asuntu traballador, tanba kuandu ko’alia kona ba traballador ne’e, haree de’it ba nia kontestu.
“Sé ita ko’alia kona ba ASEAN traballador husi Indonesia, Filipina, Malaysia no seluk tan, wainhira sira hetan direitu ba servisu, sosiedade sivil nia papel ida maka atu tau importansia ba ida ne’e”,katak Daniel.oly
