Bankada RETILIN iha Parlamentu Nasionál (PN), ameasa sei vota kontra Orsamentu Jeral Estadu (OJE) tinan 2019, tanba konsidera orsamentu ne’e la refleta povu nia moris. Maibe fo benifisiu ba grupu balun deit.
Vise Xefi bankada FRETILIN, Francisco Miranda Branco, hatete, orsamentu tinan 2019 ne’e Governu aloka ba setór ne’ebé benifisiu ba povu pursentu kiik liu hanesan, setor Saúde 4% , Agrikultura 1% , edukasaun 8% be mos no saneamentu 1 %, restu husi ne’e Governu investe bo’ot liu iha mina-rai.
“Ami nia pozisaun kontra OJE ida ne’e tanba ho rasaun la iha preokupasaun ba povu nia moris no la respeita kompromisu eleitoral ne’ebé Governu ida ne’e halo bainhira iha kampaña eleitoral”,deklara Vise Xefi bankada FRETILIN, Francisco Branco ba jornalista sira iha Parlamentu Nasionál, Kuarta (5/12).
Nia esplika, FRETILIN fó votus kontra tanba OJE ne’e istoria Timor-Leste nian uza fundu mina rai, primeira vez mak a’as tebes, maibe la orienta ba moris dezenvolvimentu povu nian, hanesan la dezenvolve setor agrikultura, saúde , edukasaun infra-estrutura bázika bee moos no saneamentu
“Ami preokupa tebes sistematikamente durante tinan hira nia laran nafatin povu sei hakdasak ho falun a’an ho rai rahun osan ne’e ita la hatene ba ne’ebé ba grupu ki’ik ida mak benifisia husi mina rai ne’e, povu barak kontinua la hetan benifisiu”,koalia Branco.
Hatan ba preokupasaun ne’e, Prezidente Parlamentu Nasionál, Arão Noe, hateten, bankada FRETILIN vota kontra OJE 2019 ida ne’e direitu bankada ida-idak nian.
“Prezidente Parlamentu Nasionál hanesan moderador deit tanba desizaun direitu de votu ne’e kompotensia ba deputadu no bankada ida idak ha’u lakohi fo komentáriu ba direitu bankada ida idak nian atu ezerse ninia dever”,koalia Arão.
Arão informa, tuir ajenda debate OJE sei hala’o iha loron Kinta (6/12), ne’ebé debate iha jeneralidade sei hala’o durante loron tolu, loron 7 to’o 9 feriadu no kontinua loron 11 to’o 12 kalan aprovasaun iha jeneralidade no iha loron 13 kontinua fali ba to’o 22 hodi tama ba faze espesialidade inklui final global, iha loron 24 komisaun C sei halo redasaun final no loron 27 fulan Dezembru ne’e sei hato’o ba Prezidenti Repúblika hodi hein atu promulga ka veta.ety
