Eis Prezidenti Repúblika, José Manuel Ramos Horta, husu ba Xefi Negosiador Prinsipal Fronteira Marítima, Kay Rala Xanana Gusmão no Governu, atu hakas aan atu halo diálogu ho Prezidenti Repúblika, Francisco Guterres ‘Lu-Olo’ no bankada opozisaun sira iha Parlamentu Nasionál, kona ba alterasaun Lei Atividade Petrolífera (LAP) ne’ebé Xefi Estadu veta tiha ona.
Tuir Ramos Horta, Timor-Leste hanesan nasaun ida ne’ebé frazil ka kiak tebes. Tanba ne’e, ukun nain sira tenki unidade hodi labele iha bebeik diferensia polítika atu impede dezenvolvimentu.
“Ita foin mak hahú konstrusaun Estadu ne’e foin iha tinan 2016, ita labele hanesan rekursu ba veta bebeik no dala barak. Atu la fó fatin ba Prezidenti labele halo veta, entaun Governu no maun Xanana tenki haka’as aan liu tan, buka halo diálogu ho Prezidenti Repúblika no bankada opozisaun sira, atu haree lei ne’e, tanba ha’u lafiar ké, maun Xanana lei ida alterasaun ba Fundu Petroliferu ne’e, tanba nia hakarak favorese nia aan rasik, benefisiu pessoal, tanba nia fiar presiza altera lei ne’e para planu estratéjiku dezenvolvimentu no programa Governu nian ne’ebé promesa iha kampaña eleitoral bele ezekuta”, dehan Ramos Horta ba Jornalista GMN iha Estudio 2 GMNTV Bebora Dili, Segunda (17/12/2018), hafoin partisipa iha Grande Intervista.
Ramos Horta esklarese, Governu mak halo programa, no Parlamentu Nasionál aprova, hodi Governu ezekuta programa ne’ebé mak prometidu ona iha iha tempu kampaña.
“sira (Governu) halo orsamentu konformi sira nia fiar, atu programa VIII Governu nian bele ba oin, sé kuandu hetan veta fali, entaun siginifika Governu ne’e programa liu tiha, maibé la iha meius atu ezekuta nia programa, entaun sé mak sala?. Ne’e duni ha’u hatete, diálogu importante tebes, Prezidenti Repúblika tuir ni papel nu’udar aman nasaun nian, buka halo esforsu maka’as liu tan, mesmu ké ema barak kritika maka’as, liu-liu iha media sosoial AMP no CNRT nian, krítika makas, maibé Prezidenti mak aas liu buat sira ne’e. Di’ak liu bolu nia oan sira, atu halo diálogu, tanba ne’e ha’u hatete dala ida tan, dirijenti polítiku sira favor halo diálogu didi’ak no labele krítika no ataka malu demais”, relata Ramos Horta.oly
