Ministru Reforma Lejislativa no Asuntu Parlamentar (MRLAP), Fidelis Manuel Leite Magalhães, informa, Orsamentu Jeral Estadu (OJE) tinan 2019, Governu sei tau prioridade atu investe iha fundu mina-rai, tanba VIII Governu ne’e konsidera investimentu iha fundu mina-rai bele garante sustentabilidade dezenvolvimentu ba nasaun iha kualker setor.
“Ita tenke aloka prioritária area sira ne’ebé bele sustenta dezenvolvimentu iha futuru ida ne’e mak ita halo no hare ba entermus kualitativu nia numeru ne’e sei kobre ba necesidade povu nian, liu liu iha setores ligasaun direita ho investimenti inklui kapital sosial ‘’,dehan Fidelis ba jornalista sira iha Parlamentu Nasional, Segunda (17/12).
Fidelis hatete, kapital sosial ne’e mak liga ba setor Edukasaun, Saúde, Agrikultura, bee mos no Saniamentu. Tanba ne’e, Fidelis konsidera OJE 2019 ne’e sei fo benifisiu ba povu sira hotu liu husi planu ne’ebé mak Governu trasa ona iha tinan 2019.
Antes ne’e sosiedade sivil sira kontesta orsamentu ba tinan 2019 ne’e la fo prioridade ba aspetu sosial sira hodi fo foka liu ba setor mina-rai.ety
