Bankada Partidu Demokratiku (PD) iha Parlamentu Nasional (PN) ezije promesa Aliansa Mudansa ba Progresu (AMP) atu halo uma ba veteranu sira, durante kampaña eleitoral.
“Ita hein katak kompromisu ne’e bele realiza iha tinan oin kria kondisaun ba veteranu sira, tamba sira ne’ebé halo funu tinan 10 to’o tinan 24 , liu liu ba sira ne’ebé moris a’at hela la iha kondisaun, Governu bele haree sira nia situasaun, tanba sira mos terus ba rai ne’e hotu”, deklara deputado PD Adriano do Nascimento iha sala plenaria durante diskusaun OJE faze espesialidade iha Parlamentu Nasional, Segunda (17/12).
Adriano haktuir, dadaun ne’e veteranu barak mak seidauk hetan atensaun husi Governu, tamba ne’e presija dignifika veteranus sira nia kondisaun ho dignu.
Hatán ba preokupasaun ne’e, Primeiru Ministru, Taur Matan Ruak, promete tinan oin mai sei realiza duni sira nia kompromisu iha kampaña eleitoral ne’e, maibe presiza prepara didiak planu, tamba sira presiza hatene lolos ema hira mak merese dignifika nune’e kuandu halo uma labele mosu problema hanesan ho MDG, ne’ebé Governu halo tiha barak la uza.
“Maibé ita sei halo nafatin uma ba veteranu sira, ita espera tinan oin ami sei lori mai hodi husu apoiu orsamentu ba deputadu sira liga ho dignifika veteranu sira”,esplika Taur.ety
