Deputada bankada Frente Revolucionario do Timor-Leste Independente (FRETILIN), Maria Angelica Rangel, preokupa ho polítika VIII Governu nian, tanba antes ne’e, Primeiru Ministru (PM), Taur Matan Ruak kompromete sei implementa programa zero plástiku, maibé sira kontinua uza plastíku (coby house-red) sai mahon ida hodi fasilita servisu Governu nian.
“Tinan-tinan ita halo manutensaun ba iha coby house ne’e kustu ne’ebé maka fó todan ba OJE, ami nia komisaun sira iha PN ne’e iha mós coby house, mais ha’u sai deputada tinan 7 ona nunka haree, ami tau osan atu halo manutensaun, ami nia coby house iha PN ne’e tinan hira ona, signifika utilizasaun bem estar Estado nian ne’e imi halo la loos no polítika ne’e sala ona, kuandu imi tau coby house no ne’e kontra polítika PM nian atu halo zero plastíku”, deputada bankada FRETILIN liu husi ninia deklarasaun polítika, iha debate OJE ba daruak, iha faze jeneralidade, Sesta (14-12-2018).
Nia akrensenta, esplikasaun husi SEFOPE, Julião da Silva atu halo manutensaun ba coby house iha edifisiu SEFOPE, ne’e kontradiz ho polítika VIII Governu nian, ne’ebé hakarak reduz lixu plastíku iha Díli laran no teritoriu tomak.
“Ha’u konkorda tebes ho ita boot (PM) nia polítika zero plastíku ne’e, ha’u hanoin katak depois de esplikasaun, ha’u hanoin atu uza uma normal, maibé atu halo rehabilitasaun ba Coby house, coby house ne’e é uma material pre-fabricada, que hanesan mós plastíku”, haktuir Maria Rangel.
Nia sujere, sé atu halo manutensaun ba coby house no atu selu retensaun ba projetu ne’ebé halo tiha ona iha Beaço-Viqueque, diak liu halo edifísiu foun, lalika ba fali sasan pre-fabrikadu sira ne’e para kontra PM nia polítika zero plastíku.
Husi sorin seluk seluk tuir SEFOPE, Julião da Silva, relata, SEFOPE propoin orsamentu USD rihun 35.624 ba retensaun edifisiu sentru formasaun iha Beaço-Viqueque no USD rihun 160.375 propoin atu halo manutensaun ba coby house iha resintu SEFOPE, tanba konsidera ho kondisaun la favoravel ona atu uza hodi halo servisu no formasaun.
“Ita propoin osan ho montante USD rihun 35.624 no USD rihun 160.375 ne’e atu halo manutensaun ba coby house iha SEFOPE no halo retensaun ba sentru formasaun ida iha Beaço-Viqueque, tanba kondisaun coby house ne’ebé iha la diak ona no funsionariu sira labele uza hodi halo servisu, tanba ne’e maka funsionariu SEFOPE nian servisu fali iha fatin seluk, fora husi edifisiu sentral”, haktuir Julião da Silva.
Entretantu OJE ba SEFOPE nian pasa ona iha PN ho montante USD tokon 5.627 ho votus a favor 39, kontra 5 no abstensaun 18. ves
