Observador pólitika, Camilo Ximenes, hateten, VIII governu konstitusional sedu liu mehi atu halo remodelasaun, tanba ideal liu kompleta estrutura membru governu atu labele fó impaktu ba ezekusaun Orsamentu Jeral Estadu (OJE) 2019 nian.
"Ha’u hakfodak oituan, kuandu rona remodelasaun, e tanba saida no atu remodela saida? primeiru sedu liu ita koalia konabá remodelasaun, devia primeiru AMP (Aliança Mudança ba Progresu) tenke koalia no kompleta lai ninia estrutura governu, ne'ebé mak ema na'in sia seidauk kompleta, e agora ita atu remodela parte ida ne'ebé, entaun importante liu mak subtitui lai lista membru ne'ebe hetan dezkonkorda husi Prezidente da Repúblika," hateten Observador pólitika Camilo Ximenes, ba GMN iha nia knár fatin Kampus Lama UNTL, Kaikoli Díli, Tersa (04/12/2018) relasiona deklarasaun Primeiru Ministru, Taur Matak Ruak ne'ebé deklara bainhira to’o tempu tenke halo remodelasaun ba membru governu.
Tuir Camilio Ximenes katak, remodelasaun bele akontese wainhira OJE 2019 aprova tiha ona.
"Orsamentu jeral estadu tinan 2019 kuandu aprova ona, ne'e ita bele koalia ona ba remodelasaun. Remodelasaun ne'e bele akontese iha tinan oin, entre fulan Maiu ou Juñu, tanba ita bele haree ona no bele koloka fali ema tuir posizaun ne'ebé mak sertu, maibe na realidade estrutura deit seidauk kompletu oinsa mak ita koalia ona remodelasaun ?," afirma Camilo Ximenes.
Oras ne’e daudaun membru oitavu governu hamutuk 28, kompostu husi primeiru ministru, ministru nain 11, vise ministru nain 7 no sekretariu estadu nain 11. Ito
