GMN TV Politika PN sujere Xefi Governu esforsu maka’as hodi solusiona polémika membru governu pendente

PN sujere Xefi Governu esforsu maka’as hodi solusiona polémika membru governu pendente

0 views

Reprezentante povu iha uma fukun Parlamentu Nasional (PN) Eziji ba Primeiru Ministru (PM), Taur Matan Ruak atu kontinua esforsu maka’as, hodi buka solusaun ba membru governu  indijitadu na’in 9 ne’ebé  seidauk simu pose husi Prezidenti Repúblika (PR), Francisco Guterres “Lú Olo”.

“VIII Governu Konstitusional estebelese ona durante tinan rua resin, maibé to’o agora seidauk iha solusaun kona-bá membru governu nain 9 refere. Ita hotu hatene, akompañia no haree situasaun riil iha rai-laran liga ba asuntu governativa, membru governu seidauk kompletu, bainhira maka atu kompleta no to’o bainhira ita hein”, deputadu bankada KHUNTO, António Verdial liu husi ninia deklarasaun polítika iha PN, Tersa (10-12-2019).

Nia esplika, loron ba loron, dada malu no dudu malu, kleur tebes ona, nune’e husu ba na’i-ulun sira sé bele hakotu ona impase polítiku, foku servisu ba moris di’ak povu ni’an.

“Ita-nia pasiensia  hamosu  konsekuensia ne’ebé todan ba vida nasaun, liu-liu povu ne’ebé  hein hela dezenvolvimentu”, tenik António.

Husi sorin seluk, Xefi bankada Partido Democrático (PD), António da Conçeicão “Kalohan”, hateten, governu presiza kompleta estrutura VIII Governu konstitusional, atu nune’e bele fó  kontinuidade ba Orsamentu Jeral Estadu (OJE).

 “Ha’u hanoin kondisaun ne’ebé deputadu ko’alia atu kompleta estrutura VIII governu ne’e buat importante tebes, ida ne’e buat ida seidauk haree urjente, buat ida ne’ebe mós ita haree la normal iha estrutura lei orgánika prevé situasaun ida no nia andamentu to’o tinan ida resin ona, nafatin laiha solusaun. Preokupasaun husi deputadu KHUNTO ne’e eziji katak, públiku mós presiza rona informasaun ruma oinsa mak bele kompleta estrutura VIII Governu, hodi fasilita debate OJE no ezekusaun OJE. Dezenvolvimentu la’o dau-dauk ne’e, povu pasiensia hela, dalaruma ita dehan povu rende, maibé povu harohan hela ita, nune’e ita tenki hanoin buat sira ne’e di-di’ak, ita presiza OJE hodi hala’o dezenvolvimentu, maski besik tinan 3 ona la’o nafatin ho situasaun ida ne’e, nune’e tenki iha onestidade ba malu, situasaun labele kontinua hanesan ne’e, povu nesesita dezenvolvimentu”, tenik Kalohan.

Hatán ba preokupasaun ne’e, Sekretáriu Estadu  Komunikasaun Sosial (SEKOM), Merício Akara, hateten, PM Taur halo ona esforsu tuir  kompeténsia no lei haruka, hodi buka solusaun ba membru governu hirak ne’e, maibé seidauk iha konkordansia husi Xefi Estadu ho Xefi Governu.

“Ita-nia Xefi governu propoin membru governu no kontinua mantein lista, husu atu hetan pose husi Xefi Estadu, maibé to’o agora seidauk resposta husi Xefi Estadu, ita boot sira iha dalan bele konfirma ba Xefi Estadu. Husi parte Xefi Governu nia halo tuir kompeténsia no tuir lei ne’ebé iha no kontinua mantein lista ne’ebé propoin”, afirma Merício.

Enkuantu, kandidatu membru governu ne’ebé simu pose mak Francisco Kalbuadi Lay, Amandio Benevides, Helder Lopes, José Turquel, António Verdial, Jacinto Rigoberto no Virgilho Smith. Inklui Kay Rala Xanana Gusmão ho Alfredo Pirez ne’ebé lakoi simu pose, tanba solidaridade ba kandidatu sira seluk ne’ebé seidauk simu pose.

Maski nune’e, Kay Rala Xanana Gusmão ho Francisco Kalbuadi Lay, inklui António Verdial rejigna-an ona husi lista kandidatura ne’ebé pendente. ety


Banner

Foto

Notisia Ikus

PR Lú Olo fó Indultu ba Prizioneiru 11 no Kondekora Asua’in 52

November 29, 2021
Prezidente Repúblika (PR) Francisco Guterres L...

COVID-19 Loke Timor-oan Nia Neon Hadia Ekonomia Nasaun

November 29, 2021
Prezidente Repúblika (PR), Francisco Guterres L...

Lú Olo “rekoñese” Xanana mak hato’o Planu da Paz ba ONU hakotu konflitu iha TL

November 29, 2021
Prezidente Repúblika (PR), Francisco Guterres L...

Governu aprova pagamentu suplementár ba funsionariu no ajente MF

November 26, 2021
Governu sei halo pagamentu suplementár ba funsi...

Governu aprova estatutu orgánika F-FDTL

November 26, 2021
Liu husi reuniaun Konsellu Ministru (KM), deside...
1 2 3 666

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker