Laureadu Nobel da paz, José Ramos Horta, hatete, desizaun VIII Governu hodi retira proposta Orsamentu Jeral Estadu (OJE) tinan 2019 ho billiaun USD 1.950 ne’e, hanesan derrota ida ba koligasaun Aliansa Mudansa ba Progresu (AMP), tanba bankada apoiu governu mak atu vota kontra fali orsamentu ne’e.
Eis Prezidente Repúblika, José Ramos Horta, mos konsidera, OJE tinan 2020 rungu-ranga, tanba laiha diálogu husi AMP ho oposizaun, antes lori ba Parlamentu Nasional.
“Lolos ne’e tu’ur hamutuk lai ho oposizaun sira, halo diskusaun klaen hodi simu malu diak, foin lori ba Parlamentu Nasionál”, hatete José Ramos Horta iha edifísiu LABEH, Comoro, Díli, Segunda (09/12).
Ramos Horta hato’o asuntu ne’e relasiona ho Governu ne’ebé retira hikas proposta Orsamentu Jeral Estadu tinan 2020, hafoin halo diskusaun ba loron daruak iha Parlamentu Nasionál foin lalais ne’e.
Nune’e, Horta husu ba Governu atu halo diálogu ho bankada sira, antes lori ba Parlamentu Nasionál.
Eis Prezidente Repúblika ne’e mós iha esperansa katak, maske iha diferente idea, maibé nia fiar katak, AMP ho oposisizaun sei tu’ur hamutuk hodi buka solusaun, tanba Estadu presiza orsamentu atu halo dezenvolvimentu.
Entretantu, iha semana kotuk Orsamentu Jeral Tinan 2020 halo ona revizaun ba kada Ministériu, no remata ona iha Sesta kotuk. Tuir planu, Governu sei lori ba Konsellu Ministru hodi halo desizaun, antes lori ba Parlamentu Nasionál hodi debate iha espesialidade.aba
