GMN TV Economia PM Taur: Situasaun Tolu Implika PIB TL tun ba Negativu 8

PM Taur: Situasaun Tolu Implika PIB TL tun ba Negativu 8

552 views

Primeiru Ministru (PM) Taur Matan Ruak.

Primeiru Ministru (PM) Taur Matan Ruak hatete, Timor-Leste (TL) nia kresimentu ekonomia husi Produtu Internu Brutu (PIB) iha tinan 2020 nian tun ba porsentu negativu 8.6 ne’e impaktu hosi situasaun tolu.

Xefe Governu ne’e hatete, situasaun tolu ne’ebé impaktu ba kresimentu ekonomia rai-laran mak hanesan, dahuluk mak Governu uza deit rejime duodesimál iha tinan 2020 hodi sustenta mákina Estadu, tanba Orsamentu Jerál Estadu 2020 nian, hetan xumba iha PN.

Daruak mak “inserteza” polítika ne’ebé la’o durante tempu naruk nia laran. Datoluk mak kauza husi pandemia COVID-19 ne’ebé lori impaktu boot ba nasaun hotu-hotu iha mundu, tanba ho virus ne’e nia risku ba ema nia saúde.

“Iha tinan 2020 kresimentu negativu 8,6 porsentu husi Produtu Internu Brutu, tanba impaktu rejime duodesimál, inserteza polítika, pandemia COVID-19 ba medida restritiva sira hodi satán propagasaun pandemia iha territóriu nasionál,” dehan PM Taur Matan Ruak, iha intervensaun debate OJE 2022, iha PN, Kuarta (01/12).

Xefe Governu ne’e hatete tan, kontrasaun PIB tinan 2020 nian hatudu, hetok liu tan, kompara ho tinan hirak ba kotuk, tan ne’e signifika lakon kresimentu tinan barak.

“Kontrasaun Produtu Internu Brutu (PIB) iha tinan 2020 mak aat liu, dezde restaurasaun independénsia. Produtu Internu Brutu (PIB) iha tinan 2020 idéntiku ho tinan 2013 nian” katak.

Situasaun ne’e, hamosu vulnerabilidade ba timor-oan hotu, tanba impaktu ba redusaun empregu no rendimentu traballu.

Antes ne’e relatóriu prelimináriu ne’ebé relata husi Diresaun Jerál Estatístika hatudu PIB Timor-Leste nian tun drástiku ba porsentu negativu 8.703, iha tinan 2020. Kompara ho tinan 2019 ita nia PIB sa’e ba porsentu 18.724.

No atu hadi’ak kresimentu ekonómiku ne’e, presiza reativa atividade negósiu hotu, nune’e sirkulasaun osan bele la’o diak.

Nune’e mós relatóriu ne’ebé fó sai husi Fundu Monetáriu Internasionál (FMI) hatudu, husi nasaun sudueste asiátiku 11 iha tinan 2021, klasifikasaun PIB TL nian mak ki’ik liu kompara ho nasaun 10 seluk.

Klasifikasaun PIB ne’e TL nian rihun $ 3,119, Myanmar $ 4,830, Cambodia $ 4,929, Laos $ 8,519, Filipina $ 9,061, Vietnam $ 11,678, Indonézia $ 12,882, Tailándia $ 19,003, Malázia $ 29,340, Brunei $ 64,405 no Singapura $ 102,741.

Relatóriu peskiza husi Banku Mundiál mós fó sai katak, revizaun despeza públiku no kresimentu ekonómika TL la’o neineik liu. Dadaun ne’e nasaun ne’e nia taxa despeza públiku a’as liu iha mundu ho porsentu 90 husi PIB.Fer


Banner

Foto

Notisia Ikus

Governu adia dikusaun ba pedidu reforma Lere Anan Timur

January 20, 2022
Reuniaun Konsellu Ministru (KM) iha Palásiu Gov...

La atende kontaktu deputadu nian, PPN “hirus” MOP Salvador

January 20, 2022
[caption id="attachment_59069" align="aligncenter"...

CNE seidauk simu lista kandidatura PR

January 19, 2022
[caption id="attachment_59064" align="aligncenter"...

Eis Padre Martinho Gusmão deklara kandidata-an ba PR

January 19, 2022
Eis padre Martinho Germano da Silva Gusmão anú...

Ministru José Agustinho “ameasa” hasai funsionáriu APORTIL 24

January 19, 2022
[caption id="attachment_59043" align="aligncenter"...
1 2 3 683

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker