FRETILIN ASUME KARGU PREZIDENTI PN, PM HO MD

FRETILIN nudar partidu mas votadu iha eleisaun jeral, foin lalais ne’e, iha knar Konstitusional atu forma Governu. Tanba ne’e, partidu refere hola ona pozisaun hodi nomeia nia figura potensial sira ba asume kargu iha legislativu ho ezekutivu hanesan Prezidenti Parlamentu Nasional (PN), Primeiru Ministru (PM) ho Ministru Defeza (MD).

Sekretariu Jeral partidu FRETILIN, Mari Alkatiri, subliña katak, kargu tolu ne’e  sei assume husi líder partidu FRETILIN nian nudar partidu ne’ebe maka manan iha eleisaun lejislativa ba periodu 2017-2022. “Prezidenti Parlamentu, Primeiru Ministru no Ministru Defeza, ami mak sei assume hotu,” hateten Mari Alkatiri, ho hamnasa hodi responde jornalista sira hafoin partisipa iha serimonia aniversariu FALINTIL ba dala-42 iha Quatel Jeral F-FDTL, Fatuhada, Dili, Domingu (20/8/2017). Tuir ajenda katak, tomada de pose ba iha membru Parlamentu Nasional IV Legislatura nian sei halo iha Segunda ohin (21/08/2017), maibe adia fali ba semana oin, tanba sei hein Prezidenti Partido Congresso Nacional Reconstrução Timorense (CNRT), Kay Rala Xanana Gusmão, ne’ebe sei halao hela nia servisu importante iha rai liur hodi trata hela asuntus kona-ba negosiasaun fronteira maritima nian. “Seremonia ne’e adia dali ba Semana oin, tanba Xanana sei ba rai liur asuntu fronteira marítima, nia mos eleito nudar deputado, ne’ebe nia sei iha hela rai liur ita tenke respeita, nia fila mai mak nia hala’o serbisu,” afirma Mari Alkatiri. Ho adiamentu ba tomada de posse ne’e, maka Segunda ohin duni, PN III Legislatura nian iha obrigasaun atu hasai rezolusaun ida hodi prolonga tan sira nia mandate ba semana oin. Alkatiri husu ba povu Timor Leste tomak atu pasiensia hodi hein rezultadu ne’e tanba atu rezolve distinu nasaun nian presiza tempu no presiza konsensus atu nunee bele hetan nia rezultadu ida diak ba nasaun no ba povu tomak. Tuir Planu mos, Sekretario Jeral, Mari Alkatiri semana oin sei aprejenta relatório negosiasaun  ho Partidu hat, kompostu husi Partidu Congresso Nacional Reconstrução Timorense (CNRT), Partidu Libertasaun Populasaun (PLP), Partido Demokratiku (PD) no Partido Kmanek Haburas Unidade Timor Oan (KHUNTO) ba Prezidenti Republika (PR), Francisco Guterres “Lú-Olo”. Husi sorin seluk, Prezidenti Republika (PR), Francisco Guterres “Lú Olo” reforsa katak, formasuan Governu foun ne’e iha FRETILIN hamutuk ho partidu koligasaun sira seluk. “Partidu mais votadu sira hetan ona dalan di’ak para hetan koligasaun. Partidu rua hanesan CNRT ho PD  iha opozisaun konstrativa ba futuru Governasaun ida ne’e estabel para ita bele halo dezemvolvimentu ba ita nia rai,” hateten Lú-Olo ba jornalista iha Igreja Santo Antonio Motael, Dili. mia/ eus