HUGO REJEITA PN KO’A SALÁRIU DEPUTADU BA MANUTENSAUN PRADO

Prezidente Parlamentu Nasional (PN), Adérito Hugo da Costa, deklara, informasaun ne’ebé durante ne’e espalla iha públiku katak, kada fulan PN ko’a salariu deputadu III lejislatura ho valor US$ 48 mil ba manutensaun kareta Prado 65 ne’e, lalos.

Tanba tuir Hugo, PN hanesan intituisaun autonomu ne’ebé halo jestaun no manutensaun  rasik ba nia patrimoniu. “Informasaun ne’ebé espekula katak, deputadu sira partisipa osan ho montante US$ 48 mil ba manutensaun kareta ne’e laloos. Tinan ba dahuluk mandatu deputadu III lejislatura sira nian, instituisaun PN mak partisipa osan US$ 500 ba manutensaun, restu deputadu sira mak uza rasik nia osan. Wainhira kareta ne’e falla, no Parlamentu Nasional goza ninia autónomu finanseiru administrativa no patrimoniu ba operasionalizasaun transporte sira, hanesan transporte ne’ebé uza ba administrativu no ida seluk  tuir lei estatutu deputadu nian, iha direitu ba kareta durante nia mandatu,  tanba ne’e transporte rua halo separasaun la hanesan, parlamentu halo nia jestaun rasik,”haktuir Adérito Hugo da Costa ba jornalista sira liu husi konferensia imprensa ne’ebé hala’o iha salaun konferensia PN, Sesta (25/08/2017). Hugo afirma, polítika atu sosa kareta foun ba deputadu IV lejislatura, prosesa hela. “Hola kareta foun ne’e la’os buat foun ida, halo tiha ona diskusaun orsamentu iha 2016, ne’ebé autónomu atu hola, faan, leilaun no alineasaun ka halo doasaun, ne’e regra, depende ba desizaun ne’ebé foti,”katak Hugo. Antes ne’e deputadu balun deklara katak, durante mandatu iha Parlamentu Nasional, deputadu sira partisipa iha manutensaun ba kareta ne’ebé  sira uza liu husi koa saláriu.say