TR LEGALIZA REZULTADU ELPAR 2017

Tribunál de Recurso (TR) Tersa (01/08/2017), legaliza rezultadu Eleisaun Parlamentar (ElPar) tinan 2017 ba 2022, hafoin konfirma akta eleisaun durante oras 72 nia laran.

Liuhosi  akórdaun ne’ebé le’e sai hosi prezidente  Tribunal de Recurso, Deolindo dos Santos, partidu hirak ne’ebé  konsege ultrapasa bareira 4% maka partidu Frente Revolucionário de Timor-Leste Independente (FRETILIN), Congresso Nacional de Reconstrução de Timor-Leste (CNRT), Partidu Libertação Popular (PLP), Partido Democrático (PD) no Kmanek Haburas Unidade Nasionál Timor Oan (KHUNTO).

“Partidu KHUNTO ho votu 6,4% ho totál kadeira 5 iha parlamentu, CNRT 29,5% ho kadeira 22, PLP 10,6% ho kadeira 8, PD 9,8% ho kadeira 7 no FRETILIN ho votus 29,7% ho kadeira 23”, dehan Deolindo. Prezidente TR hatutan durante prosesu verifikasaun ba akta apuramentu rezultadu la mosu irregularidade inklui rekursu no reklamasaun hosi partidu sira. Kópia akordaun ne’e sei distribui mós ba órgaun eleitorál sira no segundu lei eleitorál artigu 50, rezultadu akórdaun hosi Tribunal Rekursu  sei publika iha Jornal da Repúblika iha loron 7 fulan Agostu. Partisipa iha akórdaun ne’e, prezidente CNE, reprezentante partidu vensedór sira inklui partidu hirak ne’ebé la konsege manan iha eleisaun parlamentar período ne’e no hetan mós partisipasaun hosi observadór internasionál sira. ZIL