ABAN, FRETILIN-PLP SEI “HADAU MALU” KARGU PREZIDENTI PN

Partidu mais votadu FRETILIN ho Partidu Libertasaun Popular (PLP), sei avansa ho ida-idak nia proposta ba asume kargu Prezidenti Parlamentu Nasionál (PN) iha aban Tersa (5/9/17), tanba seidauk iha konkordansia kona ba se mak atu lidera meja PN.

Portavoz Partidu Libertasaun Popular, Fidelis Magalhães, hateten, enkontru tékniku entre FRETILIN ho PLP seidauk iha akordu kona ba kompozisaun meja Parlamentu Nasionál. “Atu avansa ba oin, PLP iha nia proposta rasik ba Prezidensia Meja Parlamentu, maibé ami estrutura partidu sei deside. PLP nia pozisaun katak, PLP lakohi iha potensia iha orgaun sira hotu, maibé PLP hanoin katak, tanba iha koligasaun, entaun koligasaun tenki hamrik, no meja Parlamentu hanesan teste ida ba oinsa faze koligasaun ne’e bele hamrik ho sólidu,”deklara Fidelis ba jornalista sira iha Hotel Novo Turismo Dili, Sabadu (02/09), hafoin enkontru ho FRETILIN. Maibé Fidelis dehan, tanba enkontru ne’e seidauk iha akordu ruma entre FRETILIN ho PLP, maibé iha loron 5 agora Parlamentu tenki hamrik. “Ami sei la’o ketak-ketak, FRETILIN mai ho nia kandidatu, no ami mós sei haree ami nian. PLP nia ezijensia mak ne’e, bainhira ita harii koligasaun ida, ita tenki harii hamutuk hanesan bloku koligasaun ida, no para ida ne’e, kompozisaun meja la devia monu ka fó ba partidu ida de’it, maibé ba kompozisaun orgaun sira koligasaun ne’e, hanesan PLP ho KHUNTO,”dehan Fidelis. Nune’e mós, Adjuntu Sekretáriu Jeral Partidu FRETILIN, José Reis rekoñese katak, enkontru ténika ho PLP ne’e, seidauk iha akordu kona ba se mak atu ledera  PN. “Enkontru ne’e, ami ko’alia kona ba kestaun mais tékniku, no kestaun ba meja Parlamentu Nasionál, maibé ami hanoin katak, loron 5 fulan ida ne’e iha Parlamentu Nasionál mak ami foin avansa ho kandidatu,” informa Adjuntu Sekretáriu Jeral FRETILIN, José Reis. “Kona ba dokumentu koligasaun, ami iha ona akordu ida kona ba prinsipiu, maibé kona ba meja Parlamentu nian mak ami seidauk to’o akordu ida. Maibé ami sei avansa iha loron 5 fulan ida ne’e iha Parlamentu Nasionál,” informa José Reis. Hatan kona ba se mak sei lidera meja Parlamentu Nasionál, José Reis dehan, Partidu koligasaun tolu ne’e mak sei deside. “Loron 5 agora, meja Parlamentu tenki hamrik ona, maibé Governasaun seidauk. Iha loron 5 imi bele haree, se mak kandidatu ba Prezidenti Parlamentu Nasionál,”relata José Reis.cos