Governu anterior halo tusan, Governu aktual selu tusan

VII Governu Konstitusional ne’ebe lidera husi Primeiru Ministru (PM), Mari Alkatiri, obrigadu tenke fera ulun no halo ejersisiu oituan atu bele selu hikas tusan sira ne’ebe mak Governu  anterior halo husi tinan 2014-2015.

PM Mari Alkari hateten, Governu ne’ebe nia lidera tenke selu tusan ida boot tebes ne’ebe mak Governu anterior husik hela, liu-liu liga ho projetu fziku Estadu nian ne’ebe Governu anterior fahe ‘arbiru’ deit.

VII Governu kompremetidu ona atu tama tinan foun 2018 tenke resolve ona dividas boot ne’ebe mak Governu anterior husik hela. Tanba PM Alkatiri, la konsiente atu Nasaun no Estadu moris ho tusan.

“Ita tenke moris ho dezenvolvimentu no povu tenke  kontente asesu ba bee  mos, asesu uma ne’ebe dignu iha ida-idak nia suku ho estadas ne’ebe diak,” afirma PM Mari Alkatiri ba jornalista sira iha Palacio do Governo, Tersa (19/12/2017).

PM Alkatiri subliña katak, Governu ne’ebe nia lidera hahu loke dalan ba Governu aban bain rua sira bele kontinua saida mak iha,  laos kontinua taka saida mak la diak. tanba ne’e, Alkatiri espera katak, ho tinan foun tenke ho mentalidade foun postura foun no bvntade foun atu servisu hamutuk.

“Hakarak ita hotu la’o hamutuk, ita nia esperansa bo’ot atu tama iha Natal  ho ambiente ne’ebe diak,  ita servisu hamutuk hodi lori dezenvolvimentu ba rai ida ne’e,” afirma PM Mari Alkatiri.

Nia dehan, triste tebes  povu nia espetativa ba líder partidu politiku sira la bele responde ho positivu  iha Natal ida ne’e , iha uma kain balun la kontente  tanba problemas  ho orsamentu.

Alkatiri esplika, maske hasoru preokupaun barak,  maibe kontente haree povu hakmatek nafatin, Povu hakarak hametin paz, estabilidade no povu hanesan fo lisaun bo’ot ba lideransa nasional atgu ukun sira ho domin.

“Povu hakmatek nafatin, lalika laran taridu, tanba sedu liu ka tarde liu, solusaun sei mai, há’u fo votus ba povu atu Natal família hotu bele halibur hamutuk hametin unidade iha familia bele hametin unidade iha nasaun tomak ba povu tomak, Votus Natal tomak liu liu ba povu Katolik  no tinan foun ha’u espera atu ita muda mentalidade hametin demokrasia, paz no estabilidade,” hateten Mari Alkatiri.

Deve fo impaktu ba kredibilidade

Estadu Timor Leste seidauk selu hotu hospital internasional sira, hanesan hospital Sangla-Bali, ne’ebe durante ne’e, fo atendimentu ba transferensia moras husi TL.

Ho dsividas sira ne’e, VII Governu Konstitusional espera katak, Orsamentu Retifikativu (OR) ne’ebe loai ba aprezenta iha Parlamentu Nasional (PN) atu bele hetan apresiasaun no aprovasaun. Nune’e, Governu bele utiliza orsamentu refere atu selu tiha dividas lubuk ida mak VI Governu Konstitusional husik hela.

“Programa ho OR ne’e importante hotu ba nasaun. Governu hanesan jestor Estadu ida ne’e nian tau an iha realidade ne’ebe infrenta maka hola konsiderasaun katak OR importante no urjenti, tanba ne’e liga ho kredibilidade nasaun ida ne’e nian, tanba Timor Leste deve hospital estranjeirus,” hateten Ministro Prezidensia do Conselho Ministrus, Adriano do Nascimento ba Jornalista sira iha uma fukun Parlamentu Nasional.

Adriano do Nascimento, hatutan katak, Hospital Sangla-Bali atu hakotu ona koperasaun ho Timor-Leste, tanba seidauk selu, situasaun ne’e grave tanba kestaun kredibilidade nasaun nian.

Iha parte seluk, eis vise Prezidenti PN III Legislatura ne’e akresenta OR ne’e imposrtante mos tanba kestaun vida povu nian.

“Orsamentu ne’e mais inportante no mais urjenti, tanba kestaun vida povu nian, emprezáriu lubun tenke rekopera nia kapital, tanba halo ona projetu Estadu nian no sira tenke hetan fali sira nia osan,” hateten Adriano do Nascimento.

Ministru Prezidensia do Conselho Ministrus  ne’e reafirma mos katak, kona-ba programa Governu nian pronto ona atu lori hikas segundu programa ne’e ba PN, maibe PN ajenda uluk ona diskusaun ba OR maka Governu submete deit ona ajenda ne’ebe iha.

Iha programa primeiru VII Governu nian la passa iha uma fukun PN, tanba mosu mosaun de rezeinsaun, no dadaun ne’e diskusaun OR aprezenta ona ba PN hodi halo diskusaun, iha loron primeiru no segundu sei debate guião hodi nune’e bele guia membrouPN sira diak liu tan ba diskusaun refere. ety/mia