PM Alkatiri konsidera komunidade la disiplina uza bee mos

Primeiru Ministru (PM), Mari Alkatiri, kosnidera katak, komunidade iha kapital Dili, liu-liu konsumedores bee mos husi Servisu Agua no Saneamentu (SAS) la uza bee ho disiplina. Nune’e, fo konsekuensia ba komunidade balun la bele hetan bee mos hodi diak.

Ba situasaun falta bee mos ne’ebe komunidade sira sempre halerik, Kinta (21/12/2017), Primeiru Ministru (PM), Mari Alkatiri,  bolu  ekipa tekniku SAS  nian hodi aprezenta programa bee mos antes halo estudu hodi implementa diak liu tan planu ne’e.

“Ekipa tekniku SAS nian aprezenta programa ida kona ba bee mos iha kapital Dili, Baucau, Viqueque, Manufahi ho Lautem, programa ne’e tenke lao duni. Hau husu para halo tan estudu ba munisipiu seluk hanesan Covalima, estudu preliminar ba programa ne’e hotu ona, ne’ebe hau fo tan fulan nen para kompleta estudu ba impaktu ekonomiku no sosial hodi nune’e bele investe ona iha fatin balu,” hateten PM Mari Alkatiri ba Jornalista sira iha Palacio do Governo.

Xefi Governu rekoñese katak, bee mos iha kapital Dili araska tebes, tanba volume polulasaun sa’e maka’as, tanba ema hotu hakarak tun mai Dili hodi buka moris.

“Los duni bee mos iha Dili defisil, tanba lor-loron komunidade kontinua barak, komunidade hela bou ba bou mai ne’ebe atu kontrola mos lahetan tanba ema hot umai buka vida iha Dili, no utilizador bee mos fura tun sa’e kanu no la kopera ho Estado para halo manutensaun,” hateten Mari Alkatiri.

Nia lia tun katak, komunidade laiha konsiensia katak, bee mos atu uja ba hemu, komunidade uja fali ba fase kareta, rega rai.

Iha fatin hanesan, Direktur Jeral SAS, Gregorio Sarmento dehan, enkontru entre Primeiru Ministru ho ekipa tekniku SAS ne’e aprezenta planu ba bee mos nian li-liu iha área urbana nian.

“Ami hasoru malu ho Primeiru Ministru, tanba durante t diresaun nasional SAS halo planu barak kona ba oinsa atu fornese bee mos ba populasaun li-liu iha área urbana,” informa Gregorio.

 “Parte SAS lor-loron kontrola, maibe indisiplina husi konsumedores sira, tanba halo kuak kanu, uza arbiru, halo perfurasaun ilegal, tan ne’e defisil atu rezolve ne’e, maibe iha programa ne’ebe ami prevê hotu ona,” esplika Gregorio Sarmento.

Nia dehan tan, ba hirak ne’ebe halo perfurasaun ilegal SAS labele fo sansaun, maske iha lei ona, maibe lei refere iha faze implementasaun seidauk los. mia