PR Lú Olo: ‘Estadu seidauk garante direitu sosiais’

Prezidente Repúblika (PR), Francisco Guterres ‘Lú Olo’ informa, Timor-Leste restaura ona ninia independensia iha loron 20 Maiu 2002, harii Estadu República Democrática de Timor-Leste (RDTL), maibé seidauk konklui garante direitu sosiais.

“Hafoin restaura independensia iha 20 Maiu 2002 no ita konkista respeitu ba ita nia direitus nuudar ema, biar ita hari’i Estadu de direitu ida ne’ebé respeita direitus polítikus no dignidade sidadaun sira nian, maibé ita seidauk hetan dalan atu halakon kiak no  Estadu seidauk garante direitus sosiais,” PR Lú Olo liu husi ninia diskursu hafoin entrega premiu direitus umanus Sergio Vieira de Mello ba Timoroan nain 5, iha Palasiu Prezidensial, Bairo Píte, Díli, Sesta (15-12-2017).

Nia esplika, Estadu seidauk kumpri ninia dever atu harii vida ho dignidade, la’os ho kiak ba sidadaun hotu-hotu. Ida ne’e maka tenki sai prioridade ba povu tomak no ba rai ne’ebé maka hotu-hotu liberta ba ukun rasik-an.

“Dignidade no respeitu ba sidadaun sira-nia direitu, liberdade no garantia tuir konstituisaun haruka metin ona ohin loron iha ita-nia rain. Sidadaun sira bele ona partisipa iha vida sosiedade no kontribui oinsa de’it, atu ita harii hamutuk país ida diak liu no buras liu,”dehan PR Lú Olo.

Nia akresenta, konstituisaun RDTL la’os garante de’it direitu polítiku, maibé direitu ekonómiku, sosiais, direitu ba servisu, ba edukasaun, ba saúde, ba uma no seluk-seluk tan.

“Hanesan direitu atu moris iha ambiente ida ho kualidade, konstituisaun RDTL estabelese direitu ba hela iha uma diak ida ho kondisaun hijiene no konfortu, ida ne’e signifika Estadu tenki garante asesu ba bee moos ho kualidade iha Aldeia hotu no garante servisu hijiene no saneamentu diak,” hatutan Francisco Guterres ‘Lú Olo.

Atu sidadaun hotu-hotu iha sidade, area remotas no area rural kontribui hodi dezenvolve nasaun ho onestidade hodi hasa’i sira nia-an husi moris kiak, Prezidente Repúblika (PR), Francisco Guterres ‘Lú Olo’ apela, sidadaun hotu-hotu tenki servisu hamutuk hodi hetan direitus umanus báziku. ves