ACBN konsidera desizaun PR ba EA inkonstitusional

Associação dos Combatentes da  Brigada Negra (ACBN), konsidera desizaun Prezidenti Repúblika (PR), Francisco Guterres Lú Olo nian dissolve Parlamentu Nasional (PN), hodi hakat ba eleisaun antesipada ne’e inkonstitusional, tanba rekezitus ne’ebé hakerek iha artigu 86 Konstituisaun Repúblika Demokrátika Timor Leste (K-RDTL) la preve no la tuir saida mak Xefi Estadu deside tiha ona.

Maske nune’e, Prezidenti ACBN, Nuno Corvelo Sarmento, husu ba povu tomak atu respeita desizaun ne’ebé mak Xefi Estadu foti tiha ona.

“Nune’e permite ACBN deklara katak, desizaun Prezidenti Repúblika atu dissolve Parlamentu Nasional tuir artigu 86 alinea f, aktu ida ne’e inkonstitusional, tanba rekezitus materiais ne’ebé iha artigu ne’e, la konforma ho desizaun Prezidenti Repúblika nian,”katak Nuno Carvelo Sarmento alias Laloran ba jornalista sira, liu husi konferensia ba imprensa iha sede PST, Balide, Dili, Segunda (29/01).

Nuno Carvelo Sarmento haktuir,  ACBN nu’udar forsa ne’ebé atua iha guerilla urbana hanesan forsa espesial FALINTIL nian ne’ebé hatan diretamente ba Kay Rala Xanana Gusmão hanesan Komandante em Chefe da FALINTIL, no Taur Matan Ruak hanesan Chefe Estadu Maior General FALINTIL nian iha tempu rejistensia ba ukun aan.

“Ami senti iha dever moral no polítiku atu halo pronunsiamentu kona ba situasaun aktual no situasaun konstrusaun Estadu Direitu Demokrátiku,” relata Nuno Carvelo Sarmento.

Maibé Nuno afirma, tanba desizaun ne’e Prezidenti Repúblika foti tiha ona, povu tomak tenki hola parte ativu atu partisipa iha eleisaun antesipada hodi vota para nia rezultadu bele tulun halo ema hotu kumpri konstituisaun RDTL nian no bele hatur lolos pratikas konstitusional.

“Nu’udar forsa ne’ebé uluk atua iha FRENTI urbana, ACBN apela ba nia membrus tomak atu hahú halibur malu hodi mobiliza povu vota ba liders komando rejistensia nian ne’ebé oras ne’e lidera CNRT no PLP, no ho apoiu maka’as ona husi ita nia maun Naimori, Konseleiru Superior KHUNTO,” relata nia.

Prezidenti ACBN ne’e mós apela ba povu tomak, no kombatentes veteranus hotu atu manan konsiderasaun hodi vota ba fó vitoria ba Xanana Gusmão, Taur Matan Ruak no Naimori hodi nune’e bele asegura povu Timor Leste nia soberania tasi no soberania nasional.

“se de’it mak uluk funu hamutuk ho maun Xanana no maun Taur, la’o tuir ezemplu ne’ebé maun Naimori fó ona, mai hamutuk hodi fó vitoria masimu ba maun Xanana no maun Taur iha eleisaun antesipada ida ne’ebé atu mai,” katak Nuno Carvelo.

Artigu 86 K-RDTL hateten, hakotu Parlamentu Nasionál, iha kazu krize bo’ot institusionál nian ne’ebé labele iha formasaun Governu ka aprovasaun Orsamentu Jerál Estadu nian iha tempu naruk liu loron 60, wainhira rona tiha ona  partidu polítiku sira-ne’ebé hetan kadeira iha Parlementu Nasionál, no rona  Konsellu-Estadu, iha tempu ne’ebé laiha  kdasar jurídiku atu hala’o disolusaun.cos