António de Sá Benevides lidera koligasaun FDD

Prezidenti Partidu Unidade Dezenvolvimentu Demokrátiku (PUDD),  António de Sá Benevides eleitu ba Prezidente Frenti Dezenvolvimentu Demokrátiku (FDD).

Partidu lima ne’ebé lahetan asentu parlamentar iha eleisaun jeral 2017 ne’e, halo koligasaun hodi hanaran aan FDD mak hanesan, PUDD, UDT, FRENTI Mudança,PDN no PR.

Primeiru konferensia FDD nian ne’ebé hala’o  durante loron rua iha Hotel Luz Clarita Dili ne’e, diskuti manual koligasaun nian, no programa ne’ebé mak atu aprezenta ba militante partidu lima ne’e nian iha baze.

Hafoin eleitu, António de Sá Benevides ba jornalista sira hateten, estrutura partidu lima ne’e preparadu ona atu tu’un ba baze hodi halo konsolidasaun ba militante sira partidu lima ne’e nian, hodi infrenta eleisaun antesipada, karik Prezidenti Repúblika sei dekreta iha tempu badak.

“Ha’u agradese konfiansa ne’ebé fó mai ha’u atu lidera Frenti Dezenvolvimentu Demokrátiku ida ne’e, tuir lei ami iha ona ami nia dokumentus hotu atu lori ba rejistu iha Tribunal Rekursu. Ami sei halo enkontru alargada partidu lima ne’e, ami partidu lima ne’e prepara atu tu’un ba baze hodi halo konsolidasaun ba ami nia militante sira,”katak António de Sá Benevides ba jornalista sira iha Hotel Luz Clarita Dili, Domingu (21/01).

Nia haktuir, buat ne’ebé sira halo iha primeiru  konferensia FDD nian durante loron rua ne’e,  diskuti mós kona ba   manual polítika FDD no  programa.

“Programa sira ne’e mak ami sei lori tu’un ba iha baze para esplika ba ami-nia militante sira iha baze,”katak nia.

Nia afirma, FDD prontu atu atende desizaun saida de’it mak Prezidenti Repúblika foti. Maibé Prezidenti FDD ne’e afirma, kuandu Prezidenti Repúblika la dekreta eleisaun antesipada mós, FDD sei prepara an diak liu tan hodi infrenta eleisaun jeral 2022.

“Hanesan Partidu polítika, ami prontu atu kontribui ho ami ida-ida nia kbi’it ne’ebé mak iha, ba Timor Dezenvolvimentu Demokrátiku prontu atu fó kontribuisaun,” afirma nia.

António de Sá Benevides dehan, agora dadaun komunikasaun polítika entre FRETILIN no CNRT la’o diak hela, no kuandu Prezidenti Repúblika dekreta duni elesaun antesipada, FDD prontu partisipa iha Governu.cos