FDN fo apoiu ba AMP

Hafoin Prezidente Repúblika anunsia dissolve Parlamentu Nasionál hodi hakat ba eleisaun antesipada (EA), Forum Demokrátiku Nasionál apela sei la’o hamutuk pakote ida ho Aliansa Maioria Parlamentar (AMP), haktuir Konselleiru másimu partidu KHUNTO, José dos Santos Naimori ba jornalista sira, hafoin hasoru malu ho lideransa FDN iha sede APMT Kampung Alor, Dili, Segunda (29/01/2018).

“Sira mai atu reforsa tan ami iha AMP hodi hasoru eleisaun antesipada, ami-nia hasoru malu ne’e nu’udar amizade ida hodi prepara-an oinsa harii no kria unidade  ho paz, sai ida de’it iha AMP, hodi hasoru eleisaun antesipada  sei mai, ”haktuir José Naimori.

Iha biban hanesan, portavoz FDN, Hermenegildo Lopes ‘Kupa’ argumenta, FDN deside la’o ho AMP tanba bazeia ba prinsipiu AMP nian,  hakarak luta hodi defende konstituisaun RDTL.

“Razaun seluk ami hakarak fo última onra ba maun bo’ot líder históriku sira, hanesan Kay Rala Xanana Gusmão, Taur Matan Ruak inklui Maun Naimori  fo apoia ona ba maun bo’ot nain rua, para bele susesu iha planu estratejia dezenvolvimentu nasionál  maun Xanana trasa tiha ona, bainhira reforma karik, jerasaun kontinuador ne’e bele kontinua hodi haburas ekonómia iha Timor-Leste,”dehan Kupa.

Enkuantu, Forum Demokrátika Nasionál ne’e kompostu husi partidu 9, hanesan PST, APMT, PSD, MLPM, PDC, inklui Bloku Unidade Popular  kompostu husi partidu PMD, PDRT, PLPA.

Entretantu AMP ne’e kompostu husi CNRT, PLP no KHUNTO hodi sai opozisaun iha IV lejislatura. Maibe Prezidente Republika Francisco Guterres ‘Lu-Olo’ disolve ona Parlamentu Nasional hodi hakat ba eleisaun antesipada, nune’e oras ne’e dadauk iha PN sei funsiona komisaun permanente tuir lei haruka to’o V lejislatura foun hahú nia knaar hafoin ultrapasa eleisaun antesipada. Komisaun permenente ne’e tuir Sekretariu Jeral Parlamentu Nasional, Mateus Belo, sei involve deputadu 29. Deputadu 29 ne’e kompostu husi Partidu FRETILIN deputadu nain 10 inklui Prezidente PN, Bankada CNRT nain 10, Bankada PLP 4, PD 3, KHUNTO 2.

Oras ne’e dadauk, partidu CNRT, PLP no KHUNTO deklara ona sei ba ho lista úniku iha eleisaun antesipada. Maske nune’e to’o agora PR Lu-Olo seidauk dekreta data ba kampaña no eleisaun nian. Tuir planu PR Lu-Olo sei anunsia data ba kampaña no eleisaun iha tempu badak.Say