Governu minoritária hatodan vida sosial-ekonómika povu TL

Forum Demokrátiku Nasional (FDN), hato’o sira nia konviksaun katak, Governu minoritária ne’ebé lidera husi Primeiru Ministru, Mari Alkatiri, fó konsekuensia  todan ba vida sosial no ekonómika povu Timor Leste nian.

Portavoz Forum Demokrátiku Nasional, Hermenegildo Lopes ‘Kupa’ hateten, durante fulan hat nia laran ne’e, Governu minoritáriu ne’ebé forma husi FRETILIN no Partidu Demokrátiku, tenta utiliza meus oi-oin atu mantein sira nia poder ne’ebé laiha apoiu maioria iha Parlamentu Nasional.

“Kaer metin ba konsiensia no fiar hanesan temi ona, FDN iha konviksaun katak, Governu Minoritáriu, Koligasaun  FRETILIN-PD, duma forma klara,  durante fulan 4  nia laran ne’e,  tenta utiliza meius oin-oin atu manteim nia Poder ida ne’ebé la iha apoiu maioria parlamentar nu’udar dispoin ona iha artigu 106 no’o 85 Konstituisaun RDTL nian,  ho konsekuensias ne’ebé todan tebes ba vida sosial no ekonómika povu Timor Leste tomak, liu-liu ba sira ne’ebé kiak, mukit oras ne’e dadauk sente ona sofrimentu ekonómiku  ne’ebé hamosu husi Governu Minoritáriu ida ne’ebé buka nafatin atu mantein  nia status quo,” katak Portavoz FDN, Hermenegildo Lopes ‘Kupa’ ba jornalista sira, liu husi konferensia ba imprensa iha sede APMT Kampung Alor Dili, Sesta (12/01).

Hermenegildo hatutan, FDN nu’udar orgaun ida ne’ebé halibur partidus polítikus  ne’ebé kaer metin karakter opozisaun extra parlamentar tuir dispozisaun artigu 70 Konstituisaun RDTL nian, númeru (2) ne’ebé fó ba partidus polítiku sira direitu atu atua nu’udar forsa de opozisaun.

Nia haktuir,  nu’udar forsa polítika opozisaun extra Parlamentar, FDN manan konsiensia katak, FDN iha direitu no obrigasau, iha nivel ne’ebé hanesan ho partidu hirak ne’ebé iha assentu  Parlamentar, atu reprezenta interese nia eleitor sira, nune’e mós iha obrigasaun atu defende implementasaun forma korrekta no konsekuente prinsipius Konstitusionais RDTL nian.

“FDN fiar katak,  kualker Governu Minoritariu nunka iha kbi’it atu materializa dezenvolvimentu fíziku no ekonómiku ida ne’ebé Povu Timor Leste  hotu hakarak, no hein hela. FDN fiar mós katak, se ita hotu husik hela deit situasaun ne’e hanesan ne’e, mak nia konsekuensia sei bo’ot no todan liu tan ba povu tomak, liu-liu ba sira ne’ebé kiak no mukit,” katak Heremenegildo.

FDN  mós fiar katak, kondisaun ekonómia ne’ebé loron ba loron sai todan liu tan, sei hamoris kondisoens socio-politikas ne’ebé sei ameasa paz, estabilidade no impede ka paraliza dezenvolvimentu fíziku no naun fíziku Timor Leste nian.

“Nune’e  FDN  husu ba    Presidente Republika Demokratika  atu foti desizaun hanesan, kumpri mandatu artigu  86 alinea   (d) atu imediatamente, antes loron 18  Janeiru 2018, konvoka sesaun extra-ordinária Parlamentu Nasional , tanba to’o ohin loron Prezidenti Parlamentu Nasional abertamente, klaru no’o kompletamente, halo manobra oin-oin, hodi impede orgaun soberanu ida atu hala’o nia kna’ar no konkretija espektativas povu tomak nian,” katak Hermenegildo.

FDN mós ezije atu sesaun extra-ordinária bele ajenda lalais debate programa Governu ou Mosaun sensura hodi nune’e bele garantia rezolusaun situasaun impase ou krije governativa  ne’ebé oras ne’e dadauk la’o hela.

“Karik programa Governu rezeitadu ba dala rua, ka mosaun sensura husi AMP aprovadu, tuir artigu  112 Konstituisaun RDTL, Prezidente Repúblika bele konvida segundu partidu mais votado ka Aliansa Maioria Parlamentar ne’ebé priense kondisoes atu forma VIII Governu Konstitusional,” katak Hermenegildo.

FDN mós apela ba polítiku nain sira atu labele hamosu presedentes juridikus (agora no futuru)  ne’ebé sei la ajuda implementasaun prinsipius Estadu Direitu Demokratiku.

“La iha kondisoens jurídika  no finanseira atu realiza eleisoens antesipadas. Karik iha osan nusa la utiliza ba tulun família ne’ebé mukit no kiak ne’ebé ita hotu hakilar reprejenta sira,” katak Hermenegildo.

Maibe FDN mós afirma,  karik Prezidente Repúblika deside eleisaun antesipada, maka FDN sei prontu konkore tuir modelupartisipasaun ne’ebé mak Konsellu Prezidensial FDN sei deside.cos