Lere husu jornalista hakerek tuir faktus

Xefe Estadu Maior FALINTIL Forsa Defeza Timor-Leste (F-FDTL), Major Jeneral Lere Anan Timur, husu ba  jornalista sira atu hakerek no públika informasaun ruma tenki tuir faktus.

Major Jeneral Lere Anan Timur, hato’o  lia hirak ne´e ba  jornalista sira, Kinta (04/01/18), iha Kuartel Jeral F-FDTL Fatuhada, Dili, liu  husi konferensia imprensa relasiona  ho deklarasaun  ne´ebé mak  nia hato’o, ba jornalista sira iha Kuarta (03/01/2018), hafoin enkontru semanal ho Prezidente Repúblika,  iha Palasiu Prezidensial, Bairo-Pite Díli.

“Ha´u  konvida media atu mai para esklarese jornalista sira hakerek  iha jornal dehan  katak,  Lere apoiu ka husu  atu fó ba Maioria. Maioria ne´e Jornalista sira hakarak manipula ba benefisiu  politiku partidu   politiku sira  nian,“Major Jeneral Lere Anan Timur, ba jornalista sira liu  husi konferensia imprensa, iha Kuartel Jeneral Fatuhada Díli relasiona   ho deklarasaun   ne´ebé mak publika sai  husi JND,  edisaun Kuarta (03/1/18),  hafoin enkontru semanal  ho Prezidente Repúblika iha Palasiu Prezidensial Aitarak-Laran

Lere dehan,  iha nia  intervensaun ba jornalista mós nunka temi Aliansa Maioria Parlamentar ka se deít.

“Ha´u nia intervensaun mak halo ezemplu hanesan Italia mós desolve parlamentu eleisaun antesipada, España  mós halo eleisoins maibe  primeiru ema ida  la manan, segundu ema ida la manan  terseiru mós la manan, populasaun sai  kolen  entaun  sira hanoin diak liu atu  labele kolen tan diak  liu fó ba  partidu  ida maioria  absoluta para labele kria konfujaun,“dehan Lere Anan Timur.

Ho ida  ne´e Lere dehan,  kuandu  wainhira nia koalia sai kona-ba situasaun  politika rai laran.  Ohin loron  iha inserteza no duvida se mak atu ukun se mak la ukun, se mak atu tun se mak atu sa’e.

“Lider istoriku laiha konsensu, Governu   ne´ebé mak ita forma,  no parlmentu  ne´ebé mak  ita forma povu mak  foti, la´os ida-idak foti nia a´an sai ministru ka sai deputadu,  ou sai  Prezidente Repúblika,“dehan Lere Anan Timur.

Lere dehan,  atu nasaun ne´e estabil diak  liu fila fali ba nia nain mak  povu, povu mak sei  fó justisa.

“Ha´u  mós kompriende sei kolen sei husik nia servisu no lakon tempu, maibe nesesariu,“dehan Lere.

Major Jeneral  Lere Anan Timur, husu ba jornalista sira labele provoka situasaun.

“Ha´u  husu ba  jornalista sira labele  provoka situasaun ema ida que la  kontrola nia a’an tanba de´it informasaun bele funu mosu mós bele iha, entaun  mak  imi jornalista sira ho profesionalismu hakerek didiak  labele buka  titulu ida kria deit konfuzaun,“dehan Lere Anan Timur.

“Husi jornalista sira  la fó laran ba Timor hakarak turba de´it informasaun hakarak manipula informasaun para kria konfuzaun kria instabilidade iha rai laran,“afirma  Lere Anan Timur.

Lere dehan, foin dadauk imi simu karteira  profisional mas  keta seidauk too karik  keta alunu ida SD profesor  fasilita ba SMA karik dala ruma hanesan ne´e.

“Ha´u nia argumenta iha laran ne´e la´os atu fó ba AMP, ha´u dehan katak, Prezidente Repúblika mak desidi,“dehan Lere Anan Timur.avi