Lú Olo: Prezidenti Repúblika nia desizaun ida de’it

Prezidenti Repúblika, Francisco Guterres Lú Olo hateten, Prezidenti Repúblika (Lú Olo) bele rona opsaun barak konaba oinsa atu bele solusiona tensaun polítika iha rai laran, maibé to’o ikus Prezidenti Repúblika nia desizaun sei iha ida de’it. 

Prezidenti Repúblika, Francisco Guteres Lú Olo, hato’o asuntu ne’e ba jornalista sira, hafoin partisipa serimonia aniversáriu Komponente Naval Lijeiru-Falintil Forsa Defeza Timor Leste (F-FDTL) ba dala 16 iha Hera, Sesta (12/1).

Prezidenti Repúblika promete krize polítika ne’ebé mak oras ne’e dadaun la’o iha rai laran sei iha nia rohan.

“Krize polítika ne’e sei iha nia rohan, Prezidenti Repúblika bele rona opsaun ne’e to’o sanulu ka rua nulu, maibé to’o ikus desizaun ida de’it Prezidenti Repúblika nian,” Xefi Estadu ne’e afirma.

Antes ne’e mós Prezidenti Repúblika deklara ona katak, desizaun ne’ebé nia foti atu ultrapsa krize polítika ne’e sei la haterus povu no sei bazeia de’it ba konstituissaun RDTL nian.

Enkuantu Laureadu Nobel da Paz, José Ramos Horta hateten katak,  iha opsaun tolu atu solusiona impasse polítika iha rai laran mak hanesan, bankada sira iha parlamentu bele kolabora no kontribui ba VII Governu konstitusionál, atu bele hahú implementa programa, forma governu inkluzaun no eleisaun antesipada.ías