CNRT, PLP-KHUNTO asina akordu koligasaun  Hasoru EA ho pakote úniku AMP

Partidu CNRT, PLP no KHUNTO, Kinta (01/2/18), asina ona akordu hodi hakat ba Eleisaun Antesipada (EA) ho pakote ida de’it. Partidu tolu ne’e hanaran aan Aliansa Mudansa no Progresu (AMP).

Portavoz AMP, Taur Matan Ruak, hateten, maske akordu ne’e asina tiha ona, maibé lista pakote úniku AMP nian ne’e, sira seidauk bele publika sai.

“Agora ami seidauk bele fó sai, to’o konferensia mak ami fó sai, tanba kalendáriu Prezidenti Repúblika seidauk fó sai,” katak Taur Matan Ruak ba jornalista sira liu husi konferensia imprensa iha Hotel Novo Turismo, Lecidere, Dili.

Prezidenti PLP ne’e afirma, partidu tolu ne’e manan tiha ona, tanba sira iha ona kadeira 35, antes ba eleisaun antesipada.

“Ami vitória tiha ona, tanba ami 35 kadeiras, mas sei bele aumenta tan diak liu,” katak Taur Matan Ruak.

Kona ba programa saida mak partidu tolu ne’e sei aprezenta ba povu iha kampaña hodi manan povu nia konfiansa, Taur Matan Ruak dehan, sira sei fó sai ba públiku iha tempu badak.

Iha seremonia asina akordu ne’e, partisipa mós partidu sira ne’ebé hamahon aan iha FDN no FDD, no fó sira nia apoiu tomak ba koligasaun AMP ne’e.

Tuir informasaun, iha tempu badak, Prezidenti CNRT, Kay Rala Xanana Gusmão sei to’o iha Timor Leste, hodi realiza konferensia AMP nian  ba da uluk.cos