Gráfika Nasional mak imprime bulletin votus EA

foto:google

Governu aprova ona rezolusaun ida  iha semana kotuk hodi fó konfiansa ba Gráfika Nasional (GN) hodi imprime bulletin votus ba Eleisaun Antesipada (EA).

Diretor Jeral Sekretáriadu Tékniku Administrasaun Eleitoral (STAE), Acilino Manuel Branco, hateten, akizisaun ekipamentus material eleitoral ne’e atu kompleta de’it ekipamentu sira ne’ebé mak menus, ka uza hotu iha eleisaun tinan kotuk.

“Kona ba bulletin votus mós materia ida ne’ebé ita uza hotu, entaun liu husi rezolusaun Governu, indika kedas grafika nasional, tanba agora nia sai ona empreza públika nasional iha Timor Leste, entaun tuir rezolusaun ne’ebé Governu aprova ona iha semana kotuk, kontinua fó konfiansa ba grafika nasional atu bele responsabiliza ba produsaun bulletin votus,” informa Acilino Branco ba jornalista sira iha nia kna’ar fatin Caicoli Dili foin lalais ne’e.

Maibé Acilino esklarese, bulletin votus ne’e, nia prosesu sei hein prosesu kandidatura partidu polítika sira nian remata, tanba liga ho sekuensias partidu sira bandeira no logo.

“Hanesan material eskritóriu ne’e ita uza hotu iha tinan kotuk, entaun ita presiza halo fali akizisaun foun, maibé hanesan urnas no kabina votus sira ne’e, ita kompleta de’it númeru sira ne’ebé mak iha ona,” katak Acilino.

Nia haktuir, tinta eleisaun mós uza hotu iha eleisaun tinan kotuk, entaun tenki halo fali akizisaun hodi hola foun. maibé Acilino dehan, tinta ne’e nia prosesu tenki han tempu, tanba hola husi rai liur.

 “Hafoin sorteiu sai mak foin ita hatene lolos medida bulletin votus ne’e oinsa, mak foin ita halo koordenasaun ho gráfika nasional,” katak Acilino.

Antes ne’e mós Ministru Administrasaun ESTATAL, Valentim Ximenes, hateten, Konsellu Ministru sira aprova ona rezolusaun ida ne’ebé estabelese akizisaun ekipamentus no material eleitoral. Tanba ne’e, Governu asina akordu ho UNDP atu sosa tinta husi estranjeiru mai ba eleisaun antesipada.cos