JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Hakotu impase polítika ho EA, Ukun nain instrumentaliza povu

Hakotu impase polítika ho EA, Ukun nain instrumentaliza povu

Amu Pároku Manatuto, Alipio Pinto Gusmão, konsidera desizaun Prezidente Repúblika, Francisco Guterres ‘Lu-Olo’, hodi hakotu impase polítika durante fulan neen nia laran ba Eleisaun Antesipada (EA), hanesan instrumentaliza povu.

Maibe Amu Pároku Alipio Pinto Gusmão, mos dehan, desizaun PR Lu-Olo nian ne’e, tamba demokrasia mak hanorin hanesan ne’e duni, maske ho tristeza.

“Buat ne’ebé ha’u dehan, ha’u triste ne’e mak fó fali ba povu atu deside, demokrásia mak hanesan ne’e. Maibé ba ha’u ne’e instrumentaliza povu ba polítika, no uza povu atu ba fali eleisaun. Tuir lolos kuandu povu fó ona sira-nia konfiansa ne’e, lider sira mak tenki jere sira-nia votu ida ne’e,”relata Amu Alipio Pinto Gusmão ba GMN iha Igreja Manatuto Villa, Segunda (01/02).

Amu Alipio foti kestaun ne’e, relasiona ho durante fulan 6 povu Timor Leste moris iha situasaun in-serteza nia laran, tanba partidu lima ne’ebé hetan asentu iha Parlamentu Nasional, la konsege konvense malu hodi harii Governu ida ne’ebé metin ba tinan lima.

Ho situasaun iserteza ida ne’e, Prezidenti Repúblika, Francisco Guterres ‘Lu-Olo’, foti ona desizaun hodi hakotu impase polítika ne’e ho eleisaun antesipada.

Maibé komunidade sira triste ho desizaun Xefi Estadu nian ne’e, tanba konsidera ukun na’in sira uza povu hanesan instrumentu polítika atu hetan sira nia objetivu.

Amu Alipio hatutan, nia triste tanba ukun na’in sira  falta kapasidade atu halo diálogu no negosiasaun, entre partidu sira ne’ebé hetan asentu iha Parlamentu Nasional.

“Hanesan ema Igreja nian, liu-liu sidadaun Timor ida, ha’u senti triste tanba povu fó ona sira-nia votu atu partidu sira bele jere sira-nia votu ne’e atu oinsa mak bele forma Governu ida ne’ebé estavel, atu bele servi povu ida ne’e, povu nia konfiansa ne’e, ikus mai akontese fali eleisaun antesipada hanesan ne’e,” relata Amu Alipio Pinto Gusmão.

Lee hotu :   PM admira ho partidu KHUNTO nia disiplina

Nia esplika, konstituisaun RDTL artigu 106 ne’e, kuandu temi dehan maioria Parlamentar, entaun partidu sira tenki  iha kapasidade atu halo dialogu nune’e bele hetan maioria Parlamentar ida ne’e, maibé ikus mai la akontese, mak hodi hamosu impase polítika, no tama fali ba eleisaun antesipada.

“Ha’u hein katak, povu hotu maske balun laran susar, hanesan ha’u mós triste tanba ita tenki lakon tempu, lakon fali osan Estadu lubuk ida ba fali eleisaun. Antes ne’e ita akompaña iha Parlamentu ukun na’in sira hateten katak, osan atu lori ema ba tratamentu laiha, maibé agora ba eleisaun antesipada osan iha, ida ne’e kontrariu no ita bele dehan, ita nia lider sira ne’e bosok públiku, tanba ita nia povu akompaña hela,” relata Amu Alipio.

Tanba ne’e, Amu Alipio dehan, hanesan membru uma kreda nian, nia apela atu sidadaun hotu atu uza sira-nia dever hodi hakbesik an fali ba sentru votasaun, wainhira Prezidenti Repúblika dekreta ona data eleisaun.

Amu Alipio mós espera katak, iha eleisaun antesipada ne’e, ukun na’in sira labele repete fali situasaun ne’ebé agora dadaun povu infrenta.

Entretantu, estudante Ogilvio Neto de Arãujo hateten, hanesan estudante nia senti triste oit uan ho desizaun PRezidenti Repúbika nian ba eleisaun antesipada, tanba povu tenki kole dala ida tan.

“Durante fulan nen forma Governu, maibé la la’o ba oin, maibé halo fali eleisaun atesipada. Ami nu’udar estudante, eleisaun antesipada ne’e ladiak, tanba ita hatene katak, agora ne’e ami nia prosesu aprendizazen komesa la’o ba oin, entaun ami hakarak husu deit katak, eleisaun antesipada ne’e sei bele vota iha fatin ne’ebé deit, tanba ita hatene katak, ami estudante ne’e balun mai husi foho no la’o dok, entaun difisil atu ami fila fali ba vota,” relata nia.

Lee hotu :   Governu haruka ona proposta estensaun EE ba PR

Nune’e mós, komunidade António dos Reis da Costa, hateten, durante ne’e nia akompaña polítika iha rai laran hafoin eleisaun Parlamentar, ukun na’in sira halo polítika oin seluk.

Nia haktuir, iha kampaña eleitoral, ukun nain sira ko’alia lia fuan mesak furak ba povu, maibé hetan tiha konfiansa husi povu, ida-ida tau nia intrese mak iha oin, haluha tiha povu.

“Ha’u triste tanba, kuandu iha kampaña eleitoral nian, sira mai ko’alia buat oi-oin, maibé forma tiha Governu, lori programa ba Parlamentu Nasional, deputadu sira la aprova. Ita hotu tenki iha boa vontade atu hadia povu nia moris, tanba iha kampaña mós ukun nain sira dehan katak, ida ne’ebé mak manan, sei hadia povu nia moris, maibé ha’u triste tanba, bainhira sira hetan tiha asentu iha Parlamentu Nasional, hot-hotu tau intrese individu no grupu maka’as liu,” relata nia.

Nia mós lamenta katak, ho impase polítika ne’ebé mak iha, agora dadaun povu ki’ik sira mak sofre, tanba iha hospital aimoruk laiha ona, no povu mak tenki hola rasik aimoruk.

“Ida ne’e hatudu katak, nai ulun sira intrese sira nia aan rasik, la tau intrese povu no nasaun nian aas liu. Tanba ne’e, ha’u husu ba partidu lima ne’ebé hetan asentu iha Parlamentu NAsional, tuir lolos tenki koopera malu para programa Governu nian la’o hodi hadia povu nia moris, tinan lima mai fali se mak manan, tenki apoiu malu nafatin,” katak António.

Maibé António dehan, Prezidenti Repúblika foti ona desizaun ba eleisaun antesipada, husu ba povu Timor atu kumpri no fila fali ba vota hodi deside fali ukun na’in ne’ebé mak diak atu ukun povu.

Lee hotu :   PR Lú Olo kongratula INTERFET ■ Peter Cosgrove agradese povu TL

Alende ne’e, komuidade Martinho da Costa Viegas, hateten, hot-hotu tenki hakruk ba desizaun Prezidenti Repúblika nian, ne’ebé deside eleisaun antesipada.

“Maibé ita fila fali ba kotuk bainhira kampaña, lideransa sira hateten katak, sira tau interese aas tebes intrese povu nian, maibé tanba ita nia lei la fó dalan atu forma Governu minoritáriu, entaun hamosu situasaun inserteza ida ne’e,” katak Martinho.

Nune’e mós Komunidade Manatuto, Edgar dos Santos, dehan, povu Timor Leste tenki hakruk ba desizaun ne’ebé mak Prezidenti Repúblika foti tiha ona.

“Prezidenti Repúblika fó fali oportunidade hanesan ne’e, ita tenki aproveita didiak, atu nune’e Parlamentu Nasional mós bele la’o normal, no Governu mós bele la’o diak,”katak Edgar.cos

Add to Comments Here!!!!

error: Content is protected.
Secured By miniOrange
You might also like:
Ministru Manuel Vong legaliza jogus, PM Alkatiri: “Membru Governu labele lufu-lafu deit”

Primeiru Ministru (PM), Mari Alkatiri, promete...

PR konkorda eleisaun antisipada iha fulan Maiu “Governu prevé orsamentu 5 milloins”

Ministru Administrasaun Estatal Valentim Ximenes, akompaiña...

Jogu kasino impaktu fo negativu ba sosiadade Tilman:“ PM Mari Alkatiri la iha kompotensia atu interven”

Provedor Direitu Humanu no Justisa (PDHJ)...

Close