Komisaun permanente PN forma ona “Ohin, hala’o primeiru reuniaun”

Prezidenti Parlamentu Nasional (PPN), Aniceto Guterres, informa, Komisaun Permanente Parlamentu Nasional (PN), estabelese tiha ona, desde Prezidenti Repúblika disolve PN.

Tamba ne’e, Aniceto hatutan, ohin Kinta (8/2/18), Komisaun Permanente PN sei hala’o primeira reuniaun hodi hili Sekretáriu ho Vise Sekretáriu meja Komisaun Permanente PN.

“Rezolusaun ne’e aprova tiha ona, komisaun permanente PN ne’e nia membru 29, no bankada sira hotu hatama tiha ona sira-nia membru ba komisaun permanente Parlamentu nian ne’e, aban (ohin) ami halo reuniaun ona,” katak Aniceto Guterres ba jornalista sira iha PN, Kuarta (07/02).

Nia akresenta, primeiru reuniaun komisaun permante PN nian ne’e, tuir lolos hala’o tiha ona horseik, maibé adia ba ohin, tanba horseik membru komisaun permanente PN sira enkontru ho Prezidenti Repúblika, Francisco Guterres ‘Lú Olo’.

Aniceto haktuir, deputadu sira seluk ne’ebé mak naran la tama iha komisaun permanente PN ne’e, sira bele hala’o nafatin servisu iha komisaun espesializada sira iha Parlamentu Nasional, no komisaun permanente PN mak sei koordena servisu hotu iha PN.

Nia afirma, komisaun permanente PN nia kna’ar la’os atu hala’o fiskalizasaun, maibé akompaña de’it servisu Governu nian, tanba plenária laiha ona.

“Lei mak hateten katak, deputadu sira tenki kontinua hala’o sira nia kna’ar no simu nafatin salariu to’o mandatu lejislatura foun simu pose,” relata Aniceto.

Maibé Aniceto mós dehan, maske nune’e, deputadu sira labele inventa servisu iha PN, hodi públiku hatene katak, deputadu sira servisu maka’as, iha tempu Prezidenti Repúblika disolve ona PN.

 Aniceto esplika, komisaun permanente nia funsaun ne’e atu kontinua akompaña Governu hodi hatene, saida mak la’o hela iha rai laran, hodi pasa informasaun ba deputadu sira ne’ebé la tama iha komisaun permanente ne’e.

Iha sorin seluk, Xefi bankada CNRT, Arão Noe hateten, komisaun permanente PN tenki funsiona lalais, hodi haree atividade PN.

“Sira fó hatene ami via telephone de’it katak, aban (ohin) atu iha sesaun plenária primeiru komisaun permanente nian, maibé atu deskuti kona ba saida, seidauk klaru,” katak Arão.cos