Vizita bebeik Munisípiu, CNRT konsidera Alkatiri sosializa programa FRETILIN

Deputadu bankada CNRT iha Parlamentu Nasional, Duarte Nunes, konsidera vizita Primeiru Ministru (PM), Mari Alkatiri nian ne’ebé hala’o bebeik ba Munisípiu sira, la’os hala’o servisu Governu minoritariu nian, maibe hala’o servisu partidu FRETILIN nian.

Deputadu Duarte Nunes husi bankada CNRT  hateten, durante ne’e Governu jestaun halo akordu no kontratu oi-oin, maske sira hatene katak, Governu la merese ona atu halo buat sira hanesan ne’e.

“Ami haree Governu ne’e ba bebeik iha Munisípiu sira ne’e, programa laiha mós ba hela de’it, ha’u rona dehan ba sosializa programa, ida ne’e uza ida-idak nia osan ka Estadu nia osan? Komisaun Anti Korupasaun presiza haree atividade ida ne’e ba halo sosializasaun ba programa ne’e, ba interese se nian, ba povu nian ka partidu nian,”kestiona Duarte Nunes iha plenária PN, Kinta (08/02).

Deputadu husi bankada CNRT ne’e mós kestiona katak, ikus-ikus ne’e Governu la hala’o ona servisu iha kapital Dili, maibé barak liu hala’o iha Munisipiu sira.

“Ha’u haree keta ezajeradu oituan karik, tanba kuandu ita halo kontratu, tenki iha orsamentu. Buat ne’ebé ami haree, presiza dekretu ruma husi Prezidenti Repúblika karik atu limita Governu jestaun nia atividades, sela’e ita konfuzaun,” katak Duarte Nunes.

Nia akresenta, kuandu atividades partidu nian, entaun labele uza orsamentu Estadu no fasilidade Estadu, maibé tenki uza orsamentu partidu no fasilidade privadu ka partidu nian.

Maibé deputadu Antoninho Bianco husi bankada FRETILIN hateten, agora dadaun laiha ona tempu atu hadau malu poder iha Parlamentu Nasional, tanba Prezidenti Repúblika intrega fali ona poder ne’e ba povu.

“Dekretu Prezidenti Repúblika nian, entrega fali ona poder ne’e ba povu, ita hotu tenki prepara an, servisu didiak atu hetan fali fiar husi povu hodi fó ukun,” katak Antoninho.

Nia esklarese, VII Governu ne’e halo jestaun Estadu, la presiza dekretu ida husi Prezidenti Repúblika atu limita nia atividade.

“Iha konstituisaun so preve de’it kompetensia Governu, kuandu Governu foun seidauk mai, Governu tuan mak tenki halo jestaun Estadu tuir konstituisaun ne’ebé mak iha,”tenik nia.

Nia hatutan, VIII Governu sei mai, maibé sei hetan liu husi rezultadu eleisaun antesipada.

Antes ne’e Primeiru Ministru, Mari Alkatiri, hatete katak, nia ba vizita Munisípiu la’os halo kampaña, maibe lori programa VII Governu nian ne’ebé hetan rejeisaun.cos