Mariano Assanami Sabino: Kadoras GS mai TL iha impaktu pozitivu

Ministru Rekursu Minerais (MRM), Mariano Assanami Sabino, hateten, iha possibilidade kadoras husi mina matan Greater Sunrise dada mai Timór-Leste (TL), nune’e fo impaktu pozitivu ba ekonomia rai laran.

Maske nune’e Assanami, prefere, presiza iha estudu viabilidade ida kona-ba impaktu seluk kona-ba ambiental, sosial no agrikultura.

Tanba ne’e, nia parte sujere ba parte téknika, bainhira ezekuta tenke buka métodu ne’ebé familiar ho ambiental.

“Ita-nia pozisaun firme atu dada kadoras mai TL, iha ona estudu tékniku balun ne’ebé fo apoiu ba ida ne’e. Maibe ita presiza haré liutan, liu-liu iha impaktu oi-oin, ambiental ita presiza haré ba ita-nia tasi, kuandu la kuidadu ho diak mak hafoer tasi mós mundu bele fo sansaun mai ita, sosial, ekonomia no seluktan,”dehan Asanami ba jornalista iha nia knaar fatin, Bebora, Segunda (12/03/2018).

Tuir eis Ministru Agrikultura no Peska ne’e, Timor-Leste iha ona possibilidade atu dada Kadoras mai nia teritoriu, tanba estudu tékniku ida atual diferente ho estudu pasadu nian ne’ebé hateten kadoras labele dada mai, tanba razaun tasi área Timor nian sikun barak.

“Posibilidade ne’e nakloke, negosiasaun tenke la’o nafatin, agora dadaun mós estudu la’o hela, haré nia impaktu sira ba ita-nia rai, VII Governu fo apoiu tomak no ho esforsu apoiu povu hotu nian, loron ida sei realiza ita-nia hakarak, maibe halo oinsa mós kompañia, Governu Australia no Timór-Leste tenke sai lian ida de’it, atu nune’e buat sira bele la’o di’ak,”Asanami subliña.

Nia dehan, antes dada kadoras GS mai TL, parte tékniku sira presiza halo análiza klean nune’e sai referensia ba polítiku sira atu haré.

“Nia impaktu pozitivu ba ekonomia ne’e bo’ot, bainhira dada mai TL.   maibe presiza halo analija ne’ebé klean, maske ita hatene ida ne’e importante duni mai ita,”sujere Asanami.

Asanami hatutan, dada kadoras GS mai teritoriu nasional Timór-Leste sei fo impaktu pozitivu barak, hanesan fábrika sira, inklui setor agríkola, pekuaria bele folin liutan, bainhira Timór-Leste iha prosesamentu rasik ba kadoras.

Kadoras refere, bainhira dada mai Timór-Leste, sei iha 70% mai Timór-Leste no ba Australia 30%, maibe dada ba Australia, Timór-Leste hetan 80% no Australia rasik sei hetan 20%.Say