ParPol labele uza simbolu rezistensia ba buletin votu

Partidu polítiku (ParPol) sira labele uza simbolu rezistensia hanesan, naran FALINTIL, roupa, inklui naran grupu sira ne’ebé inklina iha rezistensia, esplika Prezidente Komisaun Nasionál ba Eleisaun (CNE-sigla Português), Alcino Baris ba GMN, iha nia knaar fatin Kolmera, Kuarta (28/02/2018).

“Iha lei artigu 12 alinea 2 no 3 ne’e hateten momós katak, partidu polítiku sira labele utiliza atributu konfesaun relijioza nian, inklui iha lei ParPol labele hamosu naran veteranus nian iha atributu ParPol nian, hanesan Xanana Gusmão, Taur Matan Ruak, Marí Alkatiri, inklui Ramos Horta, no labele hakerek mós hanesan naran FALINTIL, farda F-FDTL no PNTL, inklui naran organizasaun sira rezistensia nian, hanesan RENETIL, OJETIL, no seluktan,”haktuir Alcino Baris.

Alcino esplika tan, lei ParPol la haree ba  figura iha partidu husi rezistensia ka lae, maibe prefere liu ba naran no liafuan sira.

“Ami-nia interpretasaun katak, prioridade liu la’os imajen, maibe palavra rezistensia,  partidu FRETILIN ho partidu CNRT, nia naran ne’e identiku ho estatutu partidu nian, desde rejistu iha Tribunal Rekursu ne’ebé legaliza to’o agora, tanba ne’e Tribunal válida tiha ona, naran partidu CNRT ho FRETILIN ho nia estatutu, tanba ne’e la sai ona difikuldade, tanba Tribunal mak orgaun a’as liu,”dehan Baris.

Tuir lei partidu polítiku númeru 2/2016, artigu 12, alinea 2 hateten, denominasaun partidu nian, labele estabelese iha konfisaun relijioza ida ka iha ema ida nia naran, no nia símbolu labele konfunde ho símbolu nasionál ka imajen.

No alinea 3 hatete katak, partidu polítiku labele uza iha nia  denominasaun liafuan veteranu no rezisténsia.

To’o oras ne’e dadauk koligasaun Aliansa Mudansa ba Progresu (AMP) hatama ona prosesu ba Tribunal Rekursu, kona ba simbolu ne’ebé konferensista sira aprova ona foin lalais iha konferensia AMP nian ne’ebé kompostu husi Partidu CNRT, PLP, no mos KHUNTO. Maibe TR sei estuda no seidauk publika ofisialmente ba publiku kona-ba logo ka emblema AMP nian ne’ebé tau lider sira nia oin no mos boña mean.Say