Alcino Barris: CNE fo tratamentu hanesan ba ParPol hotu

Prezidenti Comissão Nacional de Eleições (CNE), Alcino Barris, hatete, CNE nia servisu no nia papel mak sempre fo tratamentu hanesan ba Partidu Polítiku (ParPol) hotu iha Timor-Leste.

Alcino Barris deklara asuntu ne’e hodi hatán ba preokupasaun no lamentasaun partidu koligasaun Aliansa Mudansa ba Progresu (AMP) ba CNE ne’ebé la hatudu imparsialidade iha periodu kampaña  eleitoral no kestiona kona-ba página CNE ne’ebé  fo informasaun detallu ba partidu balun, maibe partidu seluk lae.

“Atu klarifika preokupasaun balun ne’ebé hato’o husi responsavel Partidu Koligasaun AMP nian, ne’ebé kestiona imparsiliadade CNE nian husi Media Sosial Timor Post, konaba situasaun ne’e, ha’u hakarak klarifika katak CNE halo ona publikasaun ba Partidu Politiku no  koligasaun partidaria sira, to’o ona iha loron 16 ne’e, iha Pagina ne’e nian, ba Partidu Demokratiku (PD) dala 2 ona, Fretilin dala 4, Koligasaun Moviementu Sosial Demokrata dala 2, MDN dala 1, FDD dala 3, no AMP dala 4,”dehan Prezidenti CNE ne’e ba Jornalista sira Kuarta (25/04/2018) husi Konferensia Imprensa iha salaun CNE Kolmera, Dili.

Alcino realsa, molok to’o loron 9 Fulan Maiu, sei konklui informasaun  hanesan, tratamentu hanesan ba partidu polítiku sira iha página CNE nian, hodi informa partidu sira-nia programa no buat hotu ba públiku, inklui mos CNE oras ne’e dadaun husu partidu polítiku sira no koligasaun sira, atu hatama sira-nia profile hotu, no iha profile ne’e tenki iha programa hotu kedan, nune’e uza iha debate ne’ebé CNE prevé ona iha loron 8 no 9 Fulan Maiu

Iha okaziaun ne’e, Preizdenti CNE mos fo klarifkasaun konaba hatun Bandeira AMP nian iha Munisípiu Bobonaro, tamba bandeira ne’e besik iha Aldeia ne’ebé  CNE ulitiza nu’udar fatin  sentru ba votasaun iha loron 12 fulan maiu, husu para hasai tiha bandeira ne’e, tamba fatin ne’e destinadu ona votasaun nian.

Iha mos preokupasaun kona-ba, CNE la fo atensaun ba Partidu Politiku sira kona-ba  halo mobilizasaun masa sira ba iha kampaña, husi Munisípiu balun ba Munisípiu seluk, Prezidente CNE ne’e rekoñese.

“Los duni CNE iha enkontru sama atensaun ba Partidu Politiku sira, atu iha kampaña karik la bele mobiliza masa balun husi Munisípiu ida ba fali Munisípiu ne’ebé kampaña hala’o ba, tamba haree mos ba impaktu husi seguransa haree liu ba  tránzitu roda viaria no haree ba potensialidade konfrontasaun sira ne’ebé bele perturba instabilidade situasuan nasaun nian.”Alcino Baris.

“Ida ne’e ami husu komprensaun no boa vontade entre CNE ho Partidu no koligasaun Partidaria sira, tamba iha prorpiu Lei No 2 / 2016 kona-ba partidu poliku sira, inklui iha ne’eba konvoi ne’e direitu Partidu Politiku sira nian no lei la bandu, maibe ami dehan para, buka entendimentu ida  atu nune’e la bele mobiliza ema, dala ruma katak sira viola lei, maibe la viola, atu husu  komprensaun kauza prejuiju,  bainhira mobiliza masa husi fatin ida ba fatin seluk,”dehan Alcino.Oly