FDD hametin estrutura iha Atsabe, Tama partidu la’os tanba US$ 20

Koligasaun FRENTI Dezenvolvimentu Demokrátiku (FDD), Tersa (3/4), hala’o tomada de posse ba kordenadores Suku 12 iha Postu Administrativu Atsabe, Munisípiu Ermera.

Hafoin serimonia tomada de posse ba kordenadores hirak ne’e, reprezentante Orgaun Profisional FDD, Julio Salsinha, husu ba emposadu sira atu servisu maka’as hodi lori FDD ba vitória.

“Objetivu tama polítika ne’e, la’os tanba osan US$ 20 dolar ka fós karon ida. Polítika muda husi partidu ida ba partidu seluk ne’e normal, tanba polítika hotu hanoin ida de’it, hakarak dezenvolvimentu no hadia povu nia moris,”katak Julio ba militantes FDD iha Atsabe Villa.

Nia hatutan, polítika FDD nian ne’e, lakohi bosok hodi manan povu nia konfiansa, maibé FDD koalia buat ne’ebé realidade, tanba FDD defende lia los.

“Ita kabala lipa mós oan sira ne’e mós, ita bele kaer ita-nia rai, FDD hamrik la’os atu hadau poder, maibé atu asegura situasaun polítika ne’ebé foin dadauk ne’e akontese iha ita nia rai,”relata Julio.

Nune’e mós, Kordenador FDD Munisípiu Ermera, Postu Administrativu Atsabe, Manuel de Jesus, hateten, FDD moris atu banati tuir beiala sira-nia mehi, no FDD mosu atu hadia buat balu ne’ebé la’o lalos iha Timor Leste.

“FDD mosu atu halo istória, la’os atu konta istória, FDD mosu atu hadia povu nia moris, tanba maske ita ukun aan tinan sanulu resin lima ona, maibé povu seidauk senti moris diak,” relata Manuel de Jesus.

Nia hatutan, FDD moris husi Aldeia, tanba ne’e, FDD hatene momós kondisaun moris povu nian iha Aldeia. Nune’e FDD sei hahú dezenvolvimentu husi Aldeia mak ba nasional.

“Ne’e seremonia tomada de posse ba ami-nia estrutura FDD nian iha Postu Administrativu Atsabe, ha’u hanoin, ida ne’e formadu husi nivel Aldeia mai to’o Postu Administrativu,” katak Manuel.

Ni hatutan, ho seremonia tomada de posse ba estrutura FDD nian iha Postu Administrativu Atsabe ne’e, estrutura FDD preparadu atu tu’un ba baze hodi konsolida FDD nia program aba povu.

“Ita hein ba 12 de Maiu mai agora, karik ami mós iha vantazen barak liu, tanba ami iha Atsabe ne’e prontu atu ofrese votus 3000 ba leten ba FDD. Programa ne’ebé mak durante ne’e ami halo mak, ami haree husi Aldeia mak sa’e mai Munisípiu. Ida ne’e mak programa  ne’ebé mak atu ganha militantes FDD nian, tanba partidu barak mak nia programa ne’e, husi leten mak tu’un ba Aldeia, maibé FDD nian hahú husi Aldeia mak ba Nasional,”relata Manuel.

Manuel de Jesus, optimista katak, FDD sei hetan votu barak iha eleisaun antesipada 2018 ne’e, tanba komunidade Atsabe barak liu mak tau konfiansa ba FDD.

Alende ne’e, Prezidenti Juventude FDD,  Martinho Soares de Deus, hateten, FDD ne’e kompostu husi partidu hat (4) mak hanesan, PUDD, UDT, FRENTI Mudança no PDN.

“Ita atu halo polítika foun tuir dalan los, ita labele hatudu liman ba malu katak, partidu ida ne’e mak diak, no partidu ida ne’eba ladiak, tanba ita mesak Timoroan de’it,” relata Martinho.

Nia husu ba juventude sira iha Postu Administrativu Atsabe ne’e atu servisu maka’as hodi FDD bele manan iha eleisaun antesipada ne’e, tanba FDD prontu ona atu servi rai no povu Timor Leste.

Alende ne’e, Kordenador Postu Administrativu Atsabe, Zakarias Monteiro, hateten, estrutura FDD tenki servisu maka’as hodi hasoru laloran bo’ot ne’ebé la’o hela iha Timor Leste.

“Ita la’os la gosta Xanana ka Alkatiri, maibé ita FDD mós hakarak koko atu kaer ukun, FDD la’os kontra partidu seluk, maibé FDD buka atu hadia saida mak la’o lalos,” tenik Zakarias.

Maske lideransa FDD husi nasional la partisipa iha serimonia tomada de posse ne’e, maibé  hetan partisipasaun masímu husi militantes no simpatizantes iha Postu Administrativu Atsabe.

Kordenadores FDD ne’ebé simu pose mai husi Suku 12 mak hanesan, Suku Ata-Dame Suku  Baboe-Kraik, Suku Baboe-Leten, Suku Atara, Suku Batu-Manu, Suku Parami, Suku Laklo, Suku Tiar- Lelo, Suku Lau- Bunu, Suku Lasaun, Suku  Obulo, no Suku Leimea –Leten.cos

Leave a Reply

Your email address will not be published. Required fields are marked *