FDD tau prioridade ba setor turismu no uma lisan

Prezidenti Komisaun Politika  Nasional Frente Dezenvolvimentu Demokratiku (FDD),  Agustinho Gomes hateten FDD manan sei tau prioridade liu ba kultura uma lisan iha timor-laran tomak.

“FDD nia politika maka hakarak dezenvolve povu husi knua baze maka ba leten, liu-liu agrikultura no turismu ida ne’e maka FDD nia politika permeiru”, dehan Presidenti Komisaun Nasional Agustinho Gomes kampaña abertu iha kampaña nebe halao iha Aisirimou, Munisipiu Aileu sexta. (20-4-2018).

Nia hatutan FDD tau uma lisan tolu ne’e significa, ita nia abut no uma lisan maka ita nia is no entidade, hanesan ema timor ukun atu forte, ukun atu naruk tenki ukun ho uma lisan maka entidade ema timor nomos uma lisan sei sai hanesan objetu ba turismo.

Nunee mos Presidenti PDN, Fernando Gusmao hateten FDD hakarak hamosu ministeriu 2 ida maka ministeriu dezenvolvimentu suku katak iha minsitru ida maka tau atensaun atu dezenvolve suku hotu-hotu.

“Tinan-tinan suku tenki halo planu saida maka hakarak dezenvolve iha suku laran depois programa sira ne’e hotu sei fahe ba to’o posto, ba to’o nasional no governu sentral buka osan, aloka osan ba implementasaun programa sira ne’e ho ida ne’e maka ita nia povu hakarak programa ne’e maka liu ba ita desisde”, deklara Prezidenti PDN Fernando Gusmao.

Nia hatutan FDD hakarak implementa programa dezentralizasaun katak habesik atendementu ba sidadaun labebe sidadaun atu urus buat ruma tenki halai to’o Dili, ne’e governasaun ladiak katak governasaun ne’ebe dok husi sidadaun, tenki hakbesik ba kraik liga ba ida ne’e programa  maka FDD hakarak introdus estrutura suku sai hanesan estrutura governu ida ne’ebe maka besik liu ba povu. SIS