FP 184 mak inklina iha lista kandidatu nú 8 iha EA

Komisaun Funsaun Públika (KFP), verifika Funsionariu Públiku (FP) 184 mak naran inklina iha lista nú 8 husi partidu polítiku no koligasaun partidaria ne’ebé hetan ona aprovasaun husi Tribunal Rekursu, atu kompete iha Eleisaun Antesiapda(EA) iha loron 12 fulan Maiu tinan ne’e.

Husi funsionariu 184 ne’e, KFP foin simu pedidu lisensa Sanulu resin, hodi partisipa iha prosesu kampaña eleitoral durante fulan ida.

“To’o ohin loron iha Sanulu resin mak foin hato’o ona sira nia  pedidu lisensa espesial ho vensimentu mai komisaun, tanba lei eleisaun Parlamentar nian mós garante ida ne’e, bainhira sira sai kandidatu ba lista kandidatura ruma, sira bele goza lisensa espesial ho vensimentu, durante periodu kampaña,”relata Prezidente KFP, Faustino Cardoso ba GMN iha nia knaar fatin Matadoru, Kuarta (04/04/2018).

Tanba ne’e, prezidente KFP, husu funsionariu ne’ebé hakarak partisipa iha prosesu kampaña, kompostu husi funsionariu ne’ebé naran tama lista kandidatura ou lae,  bele rekomenda ona karta pedidu lisensa nian ba komisaun.

“Iha tempu badak nian laran, tenke hato’o karta mai komisaun atu bele hetan lisensa espesial ho vensimentu ba sira ne’ebé mak sai kandidatu, no mós ba sira ne’ebé la’os kandidatu, lei mós garante ida ne’e, sira tenke hato’o pedidu rekere mai komisaun atu bele hetan lisensa sem vensimentu, hodi bele fo biban ba sira partisipa iha porsesu demokratiku ne’e,”haktuir Faustino.

Nia haktuir tan, husi lista kandidatura 184 ne’e mós, balun komesa goza ona lisensa sem vensimentu, tanba balun antigus deputadus, inklui balun membrus Governu no balun mós fo hela apoiu ba gabinete membru Governu nian.

“Ba sira ne’ebé mak goza hela lisensa sem vensimentu ne’e, sei kontinua válidu to’o mandate remata, signifika fo pose ba lejislatura foun, sira nia mandatu remata, sira funsionariu públiku ne’ebé hakarak husu ona re-ativasaun karik sira hakarak, maibe ba sira ne’ebé sai deputadu funsionaru públiku, bele husu fali lisensa sem vensimentu durante mandate sira nian tuir prosedimentu,”relata Cardoso.

Prezidente komisaun funsaun públika ne’e informa, funsionariu públiku ne’ebé partisipa iha prosesu kampaña eleitoral, maibe laiha lisensa, hodi abandona servisu, sei kumpri prosesu dixiplinar, liu-liu ba sira ne’ebé abandona servisu liu hosi durante loron 21, sei determina pena demisaun ka sai husi funsionariu públiku.Say