Governante balun hatama ona karta lisensa

Sekretariu Estadu Komunikasaun Sosial no Porta Voz Governu, Matias Boavida, hatete, membru Governu balun mak hatama ona karta lisensa ba Primeiru Ministru, Mari Akatiri atu tuir kampaña eleitoral iha tinan 2018.

“Klaru ami hotu  sei iha karta lisensa, maibe depende mos, ami sei fahe malu, tamba ami labele husik Governu mamuk, entre ami sei kombina malu, para depois foti lisensa anual ne’ebé ami iha, hodi troka malu se mak ba uluk tuir kampaña no se mak ba tuir,” dehan Porta Voz Governu ne’e ba Jornalista sira kuarta (4/04/2018) iha Palasiu Governu.

Nia afirma, tamba sira hotu nu’udar ema polítiku, sei envolve iha kampaña eleitoral ne’e, no ba karta refere iha membru Governu lubun ida no balun mak seidauk hatama, maske la fiksa númeru membru Governu hamutuk hira mak hatama ona karta lisensa.

“Hanesan membru Governu tenki hatama karta lisensa ba Primeiru Ministru nu’udar Xefi Governu, depois aprova oinsa ita sei haree lalaok, ita sei iha dia 10, tamba ne’e ita hein ita sei iha Konsellu Ministrus dala ida tan, mak ita koalia kona-ba asuntu ne’e,”dehan Matias.Oly