FDD promete lori esperansa no mehi ba povu liu husi dezenvolvimentu

Koligasaun Frente Dezenvolvimentu Demokratiku (FDD) kompromete wainhira FDD hetan fiar husi povu, sei lori esperansa no mehi ne’ebe diak ba povu liu husi dezenvolvimentu.

“FDD mosu atu responde ba preokupasaun povu liu husi programa prioridade mak hanesan bee, elektrisidade, estrada no uma tanba problema povu nian ne’ebe bo’ot liu mak bee, estrada, elektrisidade no uma ladiak,”informa Prezidenti Konsellu Politika Nasional (KPN) FDD, Agostinho Gomes wainhira hala’o kampaña komisiu publiku dala ikus FDD nian iha Tasi-Tolu, Sabadu (5/5/2018).

Dezenvolvimentu tenki hahu husi baze atu nune’e bele hare direitamente problema saida mak durante ne’e povu hasoru.

“Programa prioridade FDD iha kapital Dili mak bee no daudaun ne’e FDD prepara ou hameno ona makina neen hodi halo perfurasaun bee ba komunidade iha kapital Dili nune’e lebele halerik tan ba bee mos,”dehan Agostinho.

Iha fatin hanesan Prezidenti Konsellu Prezidensial FDD, António de Sá Benevides hateten so iha FDD mak iha tranzisaun irasional, kaderizasaun no tranferensia ba povu nia moris diak.

“Kuandu FDD kaer ukun hakarak hamenus dezempregu iha Timor-Leste liu husi fo formasaun ba joven sira hodi ba servisu iha rai liur no rai laran no prontu atu fo servisu ba ema seluk,”hatutan António.

Nia hateten oras to’o ona atu kaer ukun no fiar an lao ba oin tanba FDD seidauk kaer ukun kompara ho partidu sira seluk ne’ebe halo retorika politika deit tanba antes ne’e sira ukun ona.

FDD avansa ho plataforma kapa neen (6 K) ne’ebe sei fo esperansa ba povu signifika kualidade humanu no kultura, kualidade infrastrutura, kualidade boa governasaun, kualidade ekonomia, kualidade justisa no kualidade nasionalismu patriotismu liga ba defeza ho seguransa.

Kampaña koligasaun ho numeru sorteiu hitu ne’e hetan partisipasaun masimu husi militantes no simpatizantes iha kapital Dili inklui labarik no hetan seguransa husi PNTL no observador nasional no internasional. Ita