Mariano Assanami Sabino: Dezenvolve sistema agrikula no edukasaun inkluzivu

Prezidenti Partidu Demokratiku (PD), Mariano ‘Assanami’ Sabino, promete sei dezenvolve, sistema agrikula, turízmu no edukasaun exluzivu iha Postu Administrativu Maliana, Munisípiu Bobonaro.

Prezidenti Partidu ho númeru sorteiu rua, Mariano Assanami Sabino hatutan, Bobonaro pontesialidade  ba agrikultura tanba ne’e, wainhira hetan votus konfiansa husi povu, PD sei dezenvolve área agrikula liu husi dezenvolve bareira irigasaun ba natar, inklui ai-horis sira seluk ne’ebé fó benefísiu ba Komunidade iha Maliana.

“Ita la’os iha área ida ou rua deit hanesan ekonomia no turízmu ne’ebé mak ita dezenvolve hodi hatama reseitas mai iha ita nia estadu, maibé iha mós área seluk, ne’ebé mak ita bele dezenvolve maske durante ne’e, ita dezenvolve ona mak hanesan sistema agrikula enjeralmente no partikularmente bee nune’e bele fó moris ba aihan sira, fó moris ba aihoris sira no seluk tan. Bobonaro iha bee lubuk ida ne’ebé ita bele dezenvolve hanesan bee marobo, no bee seluk tan ne’ebé ita bele dezenvolve hodi fó moris ba ita nia ema,” hateten Prezidente PD, Mariano ‘Assanami’ Sabino, promete ba militante no simpatizante sira PD nian, iha Postu Administrativu Maliana, Munisípiu Bobonaro, Sábadu (5/5/2018), iha nia kampaña polítiku ba dala 24.

Entretantu membru komisária Polítika PD, Lourdes Bessa, husu ba militante no simpatizante sira atu  hili PD tanba PD mak sei bele kontinua servi povu TL liu husi liberdade independénsia TL ne’ebé ema barak selu ona ho sira nia vida.

“Tanba ne’e bainhira Partidu Demokrátiku manan sei adia sistema edukasaun ne’ebé di’ak no inkluzivu nune’e bele fó asesu ba ema hotu, kiak no riku, ema normál no naun normal (idozus) tuir Konstituisaun haruka,”nia afirma.

Kampaña Partidu Demokrátiku, ne’ebé hala’o iha kampu fetobol Maliana ne’e hetan antusiaizmu maka’as husi militante no simpatizante sira PD,  Munisípiu Bobonaro, no hetan seguransa másimu husi PNTL no F-FDTL, no hetan observasaun direta husi órgaun eleitoral CNE STAE, no mós observador internasional balun.ola