Papel ParPol tenki kontrola militante ba paz

foto:google

Diretor Ezekutivu Asosiasaun Hukum, Hak Asasi dan Keadilan (HAK), Manuel Monteiro, afirma, Partidu Polítiku (ParPol) ninia papel la’os to’o de’it iha eleisaun, maibé kontinua hala’o ninia papel no kontrola ninia militante hodi garante paz no estabilidade to’o ezisti Governu foun.

“ParPol sira nia papel la’os hotu iha eleisaun, remata ona, sira nia papel kontinua to’o Estadu ne’e iha, nafatin sira iha papel importante hodi kontribui ba paz no estabilidade iha ita-nia rai,” Diretor Ezekutivu HAK ba Grupo Média Nacional (GMN), iha ninia knar fatin Farol, Díli, Segunda (14-05-2018), hodi responde tensaun provokasaun entre militante partidu sira iha média sosial.

Nia informa, maioria povu inklina an iha ParPol hotu, tanba ne’e ParPol ida-idak tenki koñese ninia militante no simpatizante sira, atu nune’e fasil kontrola sira.

“Ninia militante no simpatizante ne’e iha aldeia A, B no C iha hira, ne’e ParPol sira tenki hatene diak, tanba sira iha database ne’ebé maka kompletu hodi hatene ninia membru, militante no simpatizante sira, enkuantu ninia militante sira involve iha aktu krimi ruma nia hatene la-lais no nia iha obrigasaun atu hatan ba aktu krimi ne’ebé maka alega ba ParPol refere,” hatutan Manuel Monteiro.

Nia akresenta, kuandu ParPol sira la hatene ninia membru no militante sira, sidadaun no públiku tenki kestiona ParPol ida ne’e ninia ezistensia, tanba saida maka nia koñese ninia ema, tanba bainhira rejistu iha Ministériu Justisa nia lori ninia militante ninia eleitoral.

“Tanba ParPol ninia ema monu ba tentasaun krimi, hodi teri netik no impede ema seluk ninia liberdade no aktividade ekonómiku iha ida-idak ninia bairu no aldeia, ne’e labele,” haktuir Diretor Ezekutivu HAK ne’e.

Entretantu antes ne’e, Xefi Estadu Maior F-FDTL, Major Jeneral Lere Anan Timur no Komandante Jeral PNTL, Komisariu Julio Hornay, informa, sira sei kontinua servisu makaas hodi fó seguransa máximu ba eleisaun antesipada to’o formasaun Governu foun, iha paz no estabilidade nia laran.ves