PD sei hari Plaza iha Becora

Partidu Democratiku (PD) sei hari terseiru plaza iha Becora, tanba primeiru plaza iha Comoro no segundu PD sei halo iha Rai kotu Tasi Tolu.

Sekretario Jeral PD Antonio da Conseção ‘’Kalohan’’ afirma, objetivu hari plaza iha Becora ne’e, atu povu husi parte Lorosa’e mai bele tama plaza iha Becora  no husi parte  loro monu bele mai plaza Rai Kotu.

“Dala ruma ema balun dehan PD nia planu atu hari plaza iha Becora ne’e mehi, maibe lae iha Ministeriu ne’ebe hau kaer ne’e asina ona akordo ho kompania privadu indenpendente ida, agora mak ita buka hela espasu rai para realiza plaza iha Becora ne’e,’’ dehan Antonio iha nia diskursu mini kampanha iha kampu Kulau Becora, Domingo (6/05).

Iha parte seluk partidu ho numeru sorteiu rua ne’e mos sei tau atensaun ba ekonomia Timor-Leste liga ba setor agrikultur, floresta no sira seluk, nune’e Timor-Leste labele dependensia deit ba setor mina rai, hodi reforsa setor sira seluk liu-liu agrikultura hodi hamenus importasaun fos husi rai liur.

Iha fatin hanesan prezidente PD municipiu Dili PD Florencio Amaral de Jesus hatete la iha tempu ona atu fahe malu, maibe tempu ba jerasun foun sira atu hamutuk ho PD hateke ba oin hodi dezenvolve rai doben Timor Leste.

“ Ita mate mos rai Timor ne’e la naben, iha jerasaun sira tuir mai pronto atu troka fali ita nia fatin, ita sira ne’e mesak maun ho alin mai husi hun ida deit, tan ne’e ita tenki hamutuk liu liu jersaun foun hamutuk ho PD mak fatin ba jerasaun foun,’’ esolika Florencio.

Kampaña partidu ho numeru sorteiu rua ne’e hetan seguransa husi Polisia Nasional Timor Leste, observa husi CNE no hetan partisipasaun masimu husi militante no simpatizante PD.

Tuir ajenda husi CNE, PD sei halo kampanha ba dala ikus iha kampu futebol Dom Bosco, Postu Administrativu Dom Aleixo. nia