13 Juñu, PN hahu sesaun V lejislatiura

Prezidente Parlamentu Nasional (PPN), Aniceto Guterres Lopes, informa, loron 13, fulan Juñu, nu’udar data ne’ebé fiksu ona atu halo reuniaun hodi troka sesaun lejislatura IV ba mandatu V lejislatura.

“Informasaun no konvite sai hotu ona, ba  dia 13 Juñu ba primeira sesaun lejislativa, signifika lejislatura ida IV ne’e termina nia mandatu no iha loron no tempu hanesan, inisia mós lejislatura foun,”hateten Aniceto Guterres ba jornalista iha PN, Kuarta (06/06/2018).

Aniceto Guterres informa, preparasaun hodi troka sesaun lejislatura ne’e la’o hela, maibe tekinikamente preparadu ona.

Líder orgaun soberanu ne’e hateten, enkontru ho líder bankada sira la’os atu muda loron ne’ebé nia parte determina ona, tanba nia parte mak iha kompetensia hodi deside loron, tuir rejimentu haruka.

Tanba ne’e, nia parte lapresija konfirma fiksasaun data ne’e ho líder bankada sira iha Parlamentu Nasional.

Prezidente sesante ne’e afirma tan, IV lejislatura laiha relatoriu ne’ebé barak hodi hatutan ba V lejilsatura, tanba mosu impasse polítika entre opozisaun ho koligasaun iha Parlamentu Nasional, durante fulan 8 nia laran, no ladun iha atividade ne;ebé deputadu sira hala’o hanesan sesaun normal.

“Ha’u laiha relatoriu ida, ha’u relatoriu ba hau nia partidu de’it, maibe ba públiku laiha, tanba públiku akompaña tiha ona, Parlamentu Nasional ne’e nia knár importante liu mak halo lei no polítika, maibe nen  iha lei ida produz iha PN, tanba maioria opozisaun blokeia buat hotu, deputadu sira nen iha inisiativa, konaba fizkalizasaun mós, atu fizkaliza said aba atividade governu nian, ba fizkaliza de’it projeitu sira governu anterior nian, tanba programa ka projeitu foun laiha,”relata Prezidente Parlamentu Nasional.

Antes ne’e, koordenador komisaun jurisdisaun Aliansa Mudansa ba Progresu (AMP), Arão Noe, relata, AMP preparadu ona, kompostu husi estrutura Governu, organigrama VIII Governu, programa no Orsamentu Jeral Estadu tinan 2018 nian, hodi hein de’it desizaun husi Prezidente Parlamentu Nasional, Aniceto Guterres Lopes determina tempu ba primeira sesaun lejislatura nian, hodi hala’o mandatu V lejislatura.Say