JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Eleisaun ba kompozisaun PN, Opozisaun ‘walk out’ husi plenaria

Eleisaun ba kompozisaun PN, Opozisaun ‘walk out’ husi plenaria

Bankada opozisaun kompostu husi bankada FRETILIN, PD no FDD walk out husi plenária Parlamentu Nasional, tanba la konkorda ho proposta vise PN no Sekretáriu meja PN.

Deputadu Francisco Branco, husi bankada FRETILIN hateten, FRETILIN nia polítika mak, PN ne’e uma fukun povu nian, tanba ne’e tenki tau intrese povu nian ás liu.

“Nasaun ida ne’e ita hotu nian, entaun tenki simboliza iha meja da Prezidensia Parlamentu Nasional. Tanba ne’e ami hanoin katak, Polítika ida ne’e ita viola ita nia konstituisaun, tanba iha ne’eba hateten katak, tenki iha proporsionalidade reprezentasaun husi forsa polítika hotu iha Parlamentu. Ho ida ne’e mak ami nia partidu abandona plenária ida ne’e, ami labele fó ami nia votu,” katak Branco iha nia intervensaun ba plenária PN, Sesta (15/06), antes atu halo votasaun ba vise no sekretáriu PN, Sesta (15/06).

Nune’e mós Prezidenti Parlamentu Nasional sesante, Aniceto Guterres hateten, polítika partidu sira iha Parlamentu Nasional ne’e, nia objetivu atu binga malu de’it.

“Polítika ne’e atu hateten katak, ohin imi nian, aban ami nian, ida ne’e mak la’o hela, siklu ida tinan 2017 mak se kontinua hela, maibé FRETILIN hatudu dadauk nia vontade atu sai husi siklu ida ne’e, li-liu atu haree ba proporsionalidade, maibé agora ita se hanoin hela katak, uluk imi nian, agora ami nian,” katak Aniceto.

Nia haktuir, kunadu polítika binga malu ne’e kontinua la’o nafatin, mak partidu hotu iha Parlamentu Nasional sei la dignifika orgaun segundu Estadu nian ne’e.

“ITa la dignifika mandatu ne’ebé povu fó, tanba posibilidade ne’e seidauk koko, maibé ita dehan tiha ona laiha posibilidade. Realidade ne’e balu dehan, se halo aprosimasaun, balu dehan ita ba vota ona, tanba ita laiha vontade,” afirma Aniceto.

Lee hotu :   CNRT-PD: Governu presiza esplika prosesu dada kadoras mai TL

Deputadu Adriano do Nacimento, husi bankada Partidu Demokrátiku hateten, kuandu hakarak kaer metin konstituisaun RDTL, rejimentu interna Parlamentu Nasional, no intrese nasional.

“Ne’e katak, intrese partidu hirak ne’ebé hetan votus mais votadu iha eleisaun antesipada ne’e, nomós partidu hirak ne’ebé hetan asentu iha Parlamentu Nasional. Ida ne’e mak ami hatur didiak iha rejimentu Parlamentu artigu 19 alinea 4 ne’ebé hateten, eleisaun ba Vise Prezidenti Parlamentu, Sekretáriu ho Vise Sekretáriu  sira, sei halo votu sekretu, no sei buka atu asegura katak, kompozisaun lista komponente ida-ida tantu,  kuantu,  posivel iha partisipa proporsional husi bankada parlamentar ne’ebé mak hetan partisipasaun iha Parlamentu Nasional,” katak Adriano do Nacimento.

Nia hatutan, ida ne’e atu kumpri mós kompromisu Parlamentu Nasional nian katak, lejislador halo servisu tuir konstituisaun, lei no rejimentu Parlamentu Nasional.

Tanba ne’e, Adriano dehan, bankada FRETILIN ho PD hakarak hatur lolos rejimentu Parlamentu Nasional, no kaer metin de’it ba konstituisaun RDTL.

Nune’e mós, deputada Josefa Perreira husi bankada FRETILIN hateten, kaer ba rejimentu Parlamentu artigu 19, tenki iha proporsional ba bankada sira hotu iha Parlamentu kona ba Vise Prezidenti Parlamentu no Sekretáriu sira.

“Parlamentu Nasional mak uma fukun ne’ebé konsentrasaun polítika, no ida ne’e hatudu momos katak, tenki rona mós partidu opozisaun sira,la’os katak opozisaun ne’e ita tenki tau ses tiha nia,” lamenta Josefa.

Nune’e mós deputadu bankada PLP, Fidelis Magalhães hateten, proposta ba kompozisaun Vise Prezidenti sira ni Sekretáriu meja AMP nian ne’e, bazeia duni ba rejimentu Parlamentu Nasional.

“Diskusaun sira ne’ebé mak ita iha ne’e, iha referensia ba artigu 19 alinea 4 rejimentu Parlamentu Nasional. Tanba ne’e, bainhira ita remata tiha votasaun meja Parlamentu Nasional, laiha aprosimasaun ruma husi partidu sira seluk, entaun ami aprezenta lista únika ne’e ba meja,” relata Fidelis.

Lee hotu :   Alkatiri simu provizóriu obra aeroportu Rota de Sândalo Oe-Cusse

Tanba ne’e, Fidelis husu ba Prezidenti Parlamentu Nasional atu avansa ba eleisaun pakote únika AMP nian.

Diskusaun kona ba aprosimasaun no diálogu polítiku ne’e, AMP la’os ko’alia fali pasadu, maibé ko’alia buat ne’ebé proprio.

“Antes ne’e mós laiha diskusaun aproximasaun husi partidu seluk mai ami, se hakarak atu halo diálogu ho ami, horseik ne’e ita halo tiha ona, la’os hein mai to’o fali plenária mak ita halo diskusaun. Ami bele lista, ami nia lista ne’e, lista únika  no priense rekezitu oras 24,” katak Fidelis.

Maibé deputadu António de Sá Benevides, husi bankada FDD hateten, Prezidenti Parlamentu Nasional atu fó tempu ba AMP no FRETILIN atu halo diálogu ne’e, buat ida ne’ebé furak tebes, tanba durante ne’e partidu rua ne’e nunka unidade.

“Prezidenti atu fó espasu ba halo diálogu ne’e furak demais, tanba ita bo’ot sira komesa iha tinan 2000 to’o mai ne’e, ita bo’ot sira nia disionáriu ne’e, laiha liafuan ida diálogu ho negosiasaun, no povu mós hatene buat ida ne’e ho diak, tanba ne’e mak hamosu eleisaun antesipada, tanba ita bo’ot sir ania disionáriu ne’e, buat ida dialogu ne’e laiha. Eleisaun antesipada ne’e atu loke de’it dalan ba FDD atu tama, no espera katak, prezensa FDD nian ne’e, bele ajuda fasilita diálogu no negosiasaun ba imi hotu,” relata António Benevides.

Tanba ne’e, nia husu ba koligasaun AMP no FRETILIN atu halakon tiha disionáriu ida binga malu ne’e, tanba laiha benefisiu ba povu.

Alende ne’e, deputadu Aderito Hugo, husi bankada CNRT hateten, Prezidenti Parlamentu Nasional sesante, Aniceto Guterres halo ona konvokatóriu antes kona ba kompozisaun meja Parlamentu Nasional proposta ba kandidatu meja nian, maibé partidu opozisaun la aprezenta lista.

Lee hotu :   Renova EE MS hein desizaun PM

“Maibé ha’u hakfodak oituan tanba, to’o tempu atu anunsia ona, bankada sira la toma pozisaun atu komunika ho bankada hotu kona ba proporsionalidade. Tanba ne’e ha’u hanoin katak, laiha espasu ka posibilidade atu mosu lista seluk, tanba lista ne’e tenki aprezenta antes oras 24,” afirma nia.

Ho nune’e, Prezidenti Parlamentu Nasional, Arão Noe fó tempu ba koligasaun AMP, FRETILIN, PD no FDD hodi halo negosiasaun kona ba lista kandidatu ba Vise no Sekretáriu Parlamentu Nasional.

Maibé hafoin minute bankada hat ne’e halo diálogu no negosiasaun iha sala konferensia PN durante minute 30, Prezidenti PN fó sinal hodi tama fali ba plenária atu aprezenta rezultadu negosiasaun ne’e.

Deputadu Adriano do Nacimento husi bankada PD informa, bankada FRETILIN, PD no FDD hakarak hato’o sira nia vontade atu aplika rejimentu Parlamentu Nasional, hakarak hola parte iha kompozisaun meja PN.

Tanba ne’e, Adriano dehan, negosiasaun sira halo ona ho koligasaun AMP, maibé la intende malu nafatin, tanba AMP mantein pozisaun.

“Ami propoint atu iha Vise Prezidenti Parlamentu Nasional no Sekretáriu ida fó ba bankada minoria, maibé rezultadu ne’ebé AMP fó iha negosiasaun ne’e mak, lista ne’ebé mak iha ona labele muda, no labele akomuda saida mak bankada FRETILIN, PD no FDD propoint,” informa Adriano.

Nia haktuir, razaun koligasaun AMP lakohi akomoda ona opiniaun opozisaun nian ne’e mak, tanba tempu oras 24 atu aprezenta lista kandidatu ne’e liu tiha ona, tanba bankada minoria lahatama lista antes, tanba ne’e dalan laiha ona,” relata Adriano.cos

Add to Comments Here!!!!

error: Content is protected.
Secured By miniOrange
You might also like:
Alkatiri apela unidade ba lideransa  Prontu husik ZEESM

Secretario Jeral Partidu FRETILIN, Mari  Alkatiri,...

GMN hatudu duni kualidade no méritu  Jorge Serrano: GMNTV presiza kritika konstrutivu

Tinan ida ezistensia GMNTV (Televizaun Grupo...

HABURAS VIDA ESPIRITUAL GMNTV Edisaun 27

Close