LAIHA AJENDA, PN SEIDAUK HALO PLENÁRIA

Parlamentu Nasional iha Segunda horseik (18/6/2018), la hala’o plenaria hanesan baibain tanba seidauk iha ajenda ne’ebe mak tenki hasai husi rezultadu konferensia lideres bankada sira iha PN.

Tuir rejimentu Parlamentu Nasional nian katak, iha Segunda seman-semana, reprezentante povu ne’ebe eleitu ba tuur iha Uma Fukun konvoka plenaria ordinariu hodi diskuti asuntus sira ne’ebe relevante ho nesesidades nasaun no povu nian.

“Aproveita informa katak la iha plenária, tanba antes realiza plenaria tenke aprova uluk lai ajenda plenária nian liu husi konferensia lideres bankadas,” informa Sekretaria Meja Parlamentu Nasional, Maria Terezinha Viegas, hodi responde jornalista iha PN.

Iha fatin hanesan, deputado bankada AMP, Fidelis Magalhães hateten, bankada Parlamentares,  li-liu bankada parlamentar AMP hala’o ona reuniaun hodi hili Prezidenti bankada no kompozisaun meja. Mesmu nune’e, AMP hein hela konvokatorio husi meja hodi realiza plenária.

“Dau-daun ne’e ami hala’o hela enkontru hodi hili prezidenti bankada no kompozisaun meja, depois ida ne’e haruka karta ba meja PN,” hateten Fidelis Magalhães. mia