JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

FRETILIN LAMENTA MC-CNRT AKUZA PR

FRETILIN LAMENTA MC-CNRT AKUZA PR

Reprezentante povu iha Parlamentu Nasional (PN), husi bankada FRETILIN, Nelia menezes, lamenta akuzasaun Media Center (MC) partidu CNRT ne’ebé hateten Prezidente Repúblika (PR), Francisco Guterres ‘Lú Olo’ promulga lei atu fo subsídiu ba nia-an rasik.

“Bankada FRETILIN hakarak hato’o deklarasaun polítika ho intensaun atu husu klarifikasaun husi CNRT Media Center ne’ebé ikus-ikus ne’e hatudu hahalok iresponsabel, ko’alia lia-bobar no lia-falsu iha redi média sosiál. Hahalok sira ne’e hatuun tiha dignidade orgaun soberania Estadu nian. Konstituisaun RDTL hateten katak Estadu tenki defende no garante soberania pais. Maibé iha semana hirak ne’e nia laran ema hotu haree no asisti katak CNRT Media Center hakerek buat ne’ebé laloos hodi reprezenta intensaun partidu AMP nian atu halo akuzasaun hasoru PR,” deputada FRETILIN, Nelia Menezes liu husi ninia deklarasaun polítika ne’ebé lee sai iha plenaria PN, Tersa (03-07-2018).

Nia esplika, CNRT Média Center nia intensaun atu ataka PR Lú Olo ninia integridade, dignidade, kapasidade atu lidera Estadu hodi garante independensia no unidade nasional.

“Akuzasaun sira ne’e relasiona ho promulgasaun ba Dekretu lei no. 6/2018 iha dia 14 de Marsu ho intensaun atu halo povu fiar katak PR promulga lei atu fó subsidiu ba nia-an rasik. Nune’e halo ami sinti tristi no ami sei la admite sé de’it maka dezrespeita ita-nia lider nasional sira, tanba ne’e CNRT Media Centre tenki retira akuzasaun sira kontra PR no husu deskulpa imediatamente,” relata Nelia Menezes.

Nelia mos husu ba Prezidente PN, Arão Noe, nuudar mós dirijente altu iha Partidu CNRT atu responsabiliza ba hahalok CNRT Media Center ninian. Tanba CNRT Media Centre ne’e kanal ofisial partidu CNRT ninian iha redi sosial.

Lee hotu :   Apoiu orasaun ba Xanana hodi manan tan pipeline mai TL

“Ami fiar katak Prezidente PN nuudar titular orgaun soberanu ida, konsiente kona-bá konsekuensia husi hahalok CNRT Media Center halo. Nune’e nu’udar dirijente ida iha partidu CNRT, Arão Noe iha poder no mós responsabilidade ba saida de’it maka CNRT Media Center publika iha redi sosial, tenki kontrola toma responsabilidade ba naksalak ne’ebé CNRT Media Center halo,” informa Nelia Menezes.

Husi sorin seluk, deputadu CNRT, Duarte Nunes liu husi ninia intervensaun deklara, loos duni iha tinan 2017, partidu CNRT hato’o keixa ba Tribunal Rekursu kona-bá PR Lú Olo promulga lei ba votus kandidatu PR, tanba konsidera benefisia ba PR nia-an rasik.

“Ami senti kestionavel iha momentu ne’ebá, tanba ne’e maka ami hatama kestaun ba Tribunal, ami kestiona tanba iha buat balun ne’ebé que sita iha ami-nia surat. Maibé ikus mai Tribunal dehan la inkonstitusional, entaun prontu ami simu. Embora karik iha tempu ruma ita sei diskuti fali atu haree lei ne’ebé que fó dalan situasaun ida ne’e,” haktuir Duarte Nunes.

Subvensaun ne’ebé fó ba kandidatu PR ne’e hatuur iha dekretu lei númeru 6/2018, loron 14, fulan Marsu no subvensaun refere PR Lú Olo entrega ona ba partidu FRETILIN.

Entretantu to’o notísia ne’e públika GMN seidauk konfirma ho media Centre CNRT kona-bá preokupasaun ne’e.ves

 

Add to Comments Here!!!!

error: Content is protected.
Secured By miniOrange
You might also like:
HORTA HUSU ESTADU TULUN TRABALLADOR TIMOR OAN IHA KOREA

Eis Prezidenti Repúblika (PR), José Ramos...

TR LAKOHI METE DESIZAUN PR LÚ OLO

Prezidente Tribunal Rekursu (PTR), Deolindo dos...

SEKOMS SEI HALO DIAGNÓSTIKA

Loron 100 hanesan primeiru teste ba...

Close