PM Taur hasai ona Gastão ho Marcos

Primeiru Ministru (PM), Taur Matan Ruak, hasai ona Gastão de Sousa nu’udar Ministru Planeamentu no Investimentu, ho Marcos da Cruz nudar Vise Ministru ba Agrikultura no Peska, husi proposta lista membru VIII governu konstitusional.

Primeiru Ministru (PM), Taur Matan Ruak, hatete, nia sei hala’o diskusaun nafatin ho Prezidente Repúblika (PR), Francisco Guterres ‘Lú Olo’, atu bele hakotu impase polítika ne’ebé la’o dadauk iha rai laran, relasiona ho kandidatu membru Governu balun seidauk simu pose tamba kona hela kazu iha Tribunal.

PR Lú Olo  nia desizaun hodi pendenti lista membru Governu balun hodi la simu pose ho razaun, membru balun sai hela suspeitu ba investigasaun. Tamba ne’e  PM Taur hatete, agora dadaun iha ona desizaun hodi substitui kandidatu membru Governu rua mak hanesan, Gastão de Sousa nu’udar Ministru Planeamentu no Investimentu, no Marcos da Cruz nudar Vise Ministru ba Agrikultura no Peska, tamba hetan rejeisaun husi PR Lú Olo.

“Konaba lista membru Governu seidauk toma pose, ha’u hanesan Primeiru Ministru sei kontinua halo diskusaun ho señor Prezidenti para hetan solusaun ida por em quanto ami seidauk iha solusaun,”dehan Taur Matan Ruak ba Jornalista sira hafoin remata enkontru ho PR Lu Olo Segunda (10/07/2018), iha Palasiu Prezidensial Nicolau Lobato-Bairo Pite, Dili.

Bainhira husu kona-ba impase polítika ne’e fo impaktu ba estabilidade ka lae? Xefi Governu  ne’e hatan katak, la fo impaktu. Tamba nia ho PR no Timor-oan hotu nia kompromisu ida deit hametin  estabilidade no paz, ba dezenvolvimentu ekonomia sosial Timor nian.

“Ha’u hakarak hatete ba Povu sira fiar metin nafatin ba lista ne’e,  tamba ha’u uluk Prezidenti hanesan ne’e mas liu tiha, no agora mos sei liu,”garante Taur.

Membru Governu hamutuk 41, iha 29 mak simu ona pose husi P Lu-Olo no falta 12 mak seidauk  simu pose.Oly 

Leave a Reply

Your email address will not be published. Required fields are marked *