PJR: PR HUSU SETÓR JUSTISA KUMPRI DIDIAK LEI

Prokurador Jeral Repúblika (PJR), José da Costa Ximenes, hatete, Prezidenti Repúblika (PR), Francisco Guterres ‘Lu-Olo’ husu ba setór justisa sira atu kumpri didiak  lei no prinsipiu  sira ne’ebé konsagra iha nasaun Timor-Leste.

“Prezidenti Repúblika  sempre dehan suporta total ba setór justisa ninia  servisu, no husu nafatin ba setór justisa sira kumpri  didiak lei no prinsipiu sira ne’ebé konsagra iha ita-nia konstituisaun RDTL. Informa ba Prezidenti Republika  kona-ba feria Judisial, ne’ebé ita hotu hatene hahú tiha ona iha loron 1 fulan Agostu to’o 15 fulan Setembru, ne’e atu dehan katak atividade sira ne’ebé Ministériu Públiku hala’o ne’e, suspende hela to’o loron 15 fulan Setembru, aproveita feria judisial ne’e, nafatin funsiona servisu de tornu para atu haree primeiru ba kazu urjenti sira, sobre tudo ba primeiru interogatoriu no seluk tan,”dehan José da Costa Ximenes ba Jornalista sira  hafoin remata enkontru ho Prezidenti Republika, Tersa (07-08-18) iha Palasiu Prezidensial  Bairo Pite Dili.

Nia salienta, iha feria judisial ne’e mos prokurador sira halo sira-nia jestaun, orienta  mos ba prokuradoria  sira atu haree objetu krimi sira, ezemplu hanesan prosesu arkiva tiha ona, no prokuradorista sira atu bele haree kestaun sira ne’e.

Entretantu PJR mos informa ba Prezidenti Repúblika, iha loron 30, fulan Jullu,  aprezenta ona relatóriu anual ba Parlamentu Nasional, ne’e nu’udar informasaun anual ba dever ida ne’ebé konsagra iha konstituisaun no lei, informasaun ikus ne’ebé prokuradoria hato’o ba Prezidenti Republika, Prokuradoria Jeral  Repúblika selebra ona  nota de entendimentu ne’ebé koalia ona koopersaun institusional.

“Iha pontu  tolu mak koloka mak formaliza kooperasaun ho Komisaun Funsaun Públika, iha ámbitu krimi sira ne’ebé akontese iha Komisaun Funsaun Públika  nia ezersisiu, segundu krimi estrañu sira, ne’ebé funsionariu públiku sira envolve, terseiru mak prosesu sivil sira ne’ebé tama iha kompetensia Ministériu Públiku nian,”subliña José Ximenes.Oly